Նոյեմբերի 1ին Թուրքիոյ մէջ կայացած արտահերթ խորհրդարանական ընտրւթիւններուն մասնակցած են նաեւ միջազգային դիտորդներ: «Evrensel.net»ի տեղեկացմամբ՝ դիտորդներու շարքին եղած է նաեւ Եւրոպայի Հայկական Դաշնութեան կողմէ ուղարկուած երեք հոգինոց պատուիրակութիւն մը: Թուրքիոյ քրտամէտ ընդդիմադիր Ժողովուրդներու Ժողովրդավարական կուսակցութեան (Ժ.Ժ.Կ.-HDP) հրաւէրով՝ միջազգային դիտորդները Ժ.Ժ.Կ.ի նահանգային կազմակերպութեան շէնքին մէջ հաւաքուած են եւ հանրային կարծիքին ներկայացուցած են իրենց դիտարկումները:
Հայ դիտորդները պատմած են, որ իրենք շրջած են Պոլսոյ Էսենյուրթ թաղամասի 10 դպրոցները, ուր ընտրութիւններ տեղի ունեցած են: Էսենյուրթի Իպրահիմ Օզայտըն տարրական դպրոցին մէջ, ոստիկանութիւնը շուրջ 45 րոպէ անոնց թոյլ չէ տուած ներս մտնելու, ստուգած է անոնց անձնագրերը, իսկ ոստիկաններէն մէկը հարցուցած է.-«աս հայերը այստեղ ի՞նչ գործ ունին»:
Նոյն վերաբերմունքին են հայ դիտորդները արժանացած նաեւ «18րդ դար»ի դպրոցին մէջ: Դիտորդներուն շրջապատած ոստիկանները կրկին ստուգած են անոնց փաստաթուղթերը, իսկ երբ պատուիրակութեան անդամները ներկայացած են, ոստիկանները ըսած են.- «Հա, հա, հասկցայ՝ հայ էք, հայ»:
Դիտորդները նշած են, որ նման վերաբերմունքը պայմանաւորուած է այն հանգամանքով, որ Թուրքիոյ մէջ օտարազգի դիտորդներու իրաւունքներն օրէնքով յստակօրէն ամրագրուած չեն: Դիտորդները պատմած են նաեւ, որ որոշ դպրոցներու մէջ հանդիպած են իշխող Արդարութիւն եւ Բարգաւաճում կուսակցութեան (Ա.Բ.Կ.-AKP) կրծքանշանները կրող մարդոց, որոնք յաճախակի միջամտած են քաղաքացիներու քուէարկումին: Իսկ տարեց եւ հիւանդ քիւրտ ընտրողները, ըստ դիտորդներուն, համապատասխան օգնութիւն չեն ստացած ընտրատեղամասերու աշխատակիցներուն կողմէ:
Իրենց դիտարկումները ներկայացուցած են նաեւ Ֆրանսայի, Սերպիայի, Հունգարիայի դիտորդական պատուիրակութիւնները, որոնք եւս ոստիկաններու կողմէ ճնշման եւ ստուգումներու ենթարկուած են: Իսկ Թուրքիա մեկնած Յունաստանի պատուիրակութեան անդամներ ձերբակալուած եւ արտաքսուած են Թուրքիայէն: