Հայ մտաւորականը 7 օրուան համար ազատ արձակուած է
Դեկտեմբեր 2013էն ի վեր բանտը գտնուող Նշանեան, իր առժամեայ ազատագրման մասին տուած է հետեւեալ բացատրութիւնը.-«Եղած կարգադրութիւնը միայն ինծի չի վերաբերիր, այլ բազմաթիւ բանտարկեալներու համար նմանօրինակ կարգադրութիւն եղած է»: Նշանեան նաեւ յայտնած է, որ այսուհետեւ «բաց բանտային» կարգով պիտի անցընէ իր բանտարկութիւնը։
Քաղաքական հայ բանտարկեալը ըսած է, որ ցայսօր կը գտնուէր Այտըն նահանգի Սուլթան Հիսար աւանի «Աղլանճա» բանտին մէջ ու այսուհետեւ պիտի փոխադրուի նոյն շրջանին մէջ գտնուող համեմատաբար աւելի լաւ պայմաններ ունեցող բանտ մը։
Նշանեան խօսելով իր դատական գործընթացին մասին ըսած է, թէ ներկայ պայմաններու մէջ իր բանտարկութեան պայմանաժամը 11,5 տարի է եւ եթէ այդ վճիռին վրայ աւելցուի այլ 6,5 տարուան վճիռ մը, բանտարկութեան տարիներուն գումարը կը հասնի 18 տարուան։
Նշանեան վրդոված է հայութեան ցուցաբերած ընդհանուր անտարբերութենէն
Նշանեան արգելափակուած է իր հիմնած Շիրինճէ աւանին մէջ «ապօրինի շինութիւններ» կատարելու անհիմն մեղադրանքով: Մտաւորականը որոշ վրդովում յայտնած է իր հարցին կապակցութեամբ հայութեան ցուցաբերած ընդհանուր անտարբերութեան վերաբերեալ։ «Մեր ընկերները եւ մօտիկ համարուած ծանօթները չկրցան որեւէ ձեւով իմ հարցին մասին լուսաբանումներ տալ։
Օրինակ Պոլսոյ «Ակօս» շաբաթաթերթը ոչ մէկ տող գրեց իմ բանտարկութեան պայմաններուն մասին եւ այս մէկը մեծ ամօթ է»,-ըսած է ան։ Ըստ Նշանեանի, իր անկախ ըլլալուն պատճառով է նաեւ, որ ազդու կողմեր տէր չկանգնեցան իր դատին, հակառակ անոր, որ քիչ չէ թիւը անոնց, որոնք դրական կեցուածք ունին իր նկատմամբ։
Հայ մտաւորականը նաեւ ըսած է, որ հակառակ դժուարին պայմաններուն, կը շարունակէ իր մտաւորական աշխատանքը բանտին մէջ։
Ներկայիս կ՚աշխատի թրքերէն լեզուի պատմութեան նուիրուած հատորի մը վրայ, որ իր նմանօրինակ աշխատութիւններու շարքին 5րդ հատորը պիտի ըլլայ։ Նշանեան պատասխանելով Թուրքիոյ մէջ տպագրուած (բանտ մտնելէն ետք) «Աղըր Քիթապ» («Ծանր Գիրք») գիրքին մասին հարցումին, ըսած է, որ հատորը իր վերջին շրջանի հրապարակած յօդուածներուն 1000 էջերէ բաղկացող հաւաքածոն է։
Նոյնպէս յիշած է, որ իր հատորները Հայաստանի մէջ պիտի հրապարակուին հրապարակախօս Սարգիս Հացպանեանի ճիգերով։
«Երկիրը մեծ խենթութեան մը մէջ է եւ իր ճամբան կորսնցուցած»
Ս. Նշանեան, պատասխանելով Թուրքիոյ այսօրուան զարգացումներուն առընչուող հարցումի մը, նշած է.-«Երկիրը մեծ խենթութեան մը մէջ է եւ իր ճամբան կորսնցուցած։ Թուրքիա այսօր դժուար պայմաններու մէջ է ու մարդ չի կրնար կռահել, թէ այս ընթացքով դէպի ո՞ւր կ՚երթանք»։ Ան չէ բացառած, որ երկիրը ներգրաւուի քաղաքացիական պատերազմի մը մէջ։ Ըստ Նշանեանի, Թուրքիա այսօր հիւանդ է եւ այդ հիւանդութիւնը կապ ունի Միջին Արեւելքը հարուածող մեծ հիւանդութիւններուն հետ։
Անոր կարծիքով Թուրքիոյ համար այսօր կարեւորագոյն հարցը երկրի նախագահ Էրտողանի հեռանալն է։
«Էրտողանը շատ դրական եւ ճիշդ բաներ ըրաւ այս երկրին համար, բայց այսօր ան սպառած է եւ պէտք է հեռանայ։ Անոր իշխանութենէն հեռացումը դուռը կը բանայ Թուրքիոյ մէջ նոր հանգրուանի մը սկիզբին, որ պիտի ըլլայ լուծումներու հանգրուան մը։ Էրտողանի հեռացումը մեծապէս կը թեթեւցնէ ծանր վիճակի մատնուած Թուրքիան։
Էրտողան 14 տարիէ ի վեր կ՚իշխէ Թուրքիոյ մէջ եւ անոր պէս զօրամոլ մարդ մը պէտք է վայրկեան առաջ հեռանայ իշխանութենէն։ Էրտողանը այսօր Թուրքիոյ մեծագոյն խնդիրն է»,-եզրակացուցած է Նշանեան։
Աւարտին, խօսելով իր բանտարկութեան հանգամանքներուն մասին, ան ըսած է.-«Իմ դէմ եղածը անիմաստ, սարսափելի եւ ապուշ վճիռ մըն է։
Մինչ Շիրինճէի մէջ իմ ստեղծած հաստատութիւններս հիացումի եւ մեծ յաջողութեան կ՚արժանանան, անդին նոյն հաստատութիւնները ստեղծողը կրնայ մինչեւ 15 տարի բանտարկուիլ»։
Բացառելով Թուրքիայէն ընդմիշտ հեռանալու մասին խօսքերը, Նշանեան նկատել տուած է, որ Թուրքիոյ իշխանութիւններուն ուզածը արդէն իր՝ երկրէն հեռանալն է, բայց ինք այդ քայլին պիտի չդիմէ ինչ ալ ըլլան հանգամանքները։