Թուրքիոյ վարչապետի գլխաւոր խորհրդական Էթիէն Մահչուպեան «Արդար յիշողութիւն» նախաձեռնութեան տուած իր հարցազրոյցին մէջ անդրադարձած է իր պաշտօնին, Ցեղասպանութեան 100ամեակին ակնկալուող հաւանական զարգացումներուն, Ապրիլ 24ին Կալիփոլիի տօնակատարութիւններուն, ինչպէս նաեւ՝ հայ-թրքական յարաբերութիւններուն: Ան նշած է, որ Ահմէտ Տաւութօղլուի գլխաւոր խորհրդական դառնալու առաջարկը ընդունելու համար, իրմէ միայն երեք վայրկեան պահանջուած է:
“Գլխաւոր խորհրդական դառնալս Հայկական Հարցին այնքան ալ չ՛առընչուիր, քանի որ եթէ ես հայ չըլլայի, ոչինչ պիտի փոխուէր։ Տաւութօղլուի վերաբերումը ինծի հանդէպ, կամ իմ վերաբերումը՝ անոր հանդէպ, պիտի չփոխուէր”, ըսած է ան:
Պատասխանելով Թուրքիոյ այդ օրերու վարչապետ Էրտողանի կողմէ Հայերուն ուղղուած ցաւակցական ուղերձի անկեղծութեան մասին հարցումի մը՝ Մահչուպեան ըսած է. “Ցաւակցական ուղերձի անկեղծութիւնը բացայայտ էր։ Գոյութիւն ունի իսլամական զգայուն պետութիւն մը, որ կը կանգնի ճնշուածներու կողքին։ Այս պահուն, օրինակ, Թուրքիոյ մէջ կայ շուրջ 2 միլիոն սուրիացի գաղթական, ներառեալ՝ Հայեր, քրիստոնեաներ, Քիւրտեր”, յիշեցնելով նաեւ հիմնադրամներուն պատկանած գոյքը վերադարձնելու մասին իշխանութեան գլուխը գտնուող կուսակցութեան որոշումները:
Անդրադառնալով հայ-թրքական յարաբերութիւններուն, ան նշած է, թէ իր կարծիքով՝ այդ առումով Թուրքիան փորձած է քայլեր առնել՝ “հին կապանքներէն ազատելու համար, սակայն, անշուշտ, միջպետական յարաբերութիւնները շտկելը այդքան ալ դիւրին չէ”, աւելցնելով, որ քայլերը պէտք է երկկողմանի ըլլան: Ան նաեւ նշած է, թէ այդ հարցը բաւական բարդացած է՝ Ղարաբաղի հարցին պատճառով:
“Այդ պատճառով ալ, կարելի չէ զայն կարճ ժամանակահատուածի մը ընթացքին լուծել։ Միաժամանակ, պէտք է բացուի հայ-թրքական սահմանը, իսկ Ղարաբաղի հարցը՝ Հայաստանի եւ Ատըրպէյճանի միջեւ, լուծման փուլի պէտք է հասնի, եւ նոյն ժամանակ, երեք երկիրներուն միջեւ նոր յարաբերութիւններ պէտք է հաստատուին։ Այսինքն՝ բոլոր այդ խնդիրները նոյն պահուն լուծելու համար, փաթեթային լուծում մը անհրաժեշտ է”, ըսած է ան:
Մահչուպեան յոյս յայտնած է, որ Ապրիլ 24էն ետք հայ-թրքական յարաբերութիւնները աւելի հանգիստ հարթութիւն կը տեղափոխուին: