Print
Category: Յունական լուրեր

Կառավարութիւնը կազմող համախոհական ուժերու գնահատումով՝ «Ոսկեայ արշալոյս» կուսակցութեան նախագահի ու ղեկավար խաւի դէմ դատախազական հետապնդումը, «թրոյքա»ի ճնշումները եւ երկրին ու ընկերութեան մէջ յամեցող դժուարութիւնները լուծելու ճամբան քուէատուփերու միջոցաւ կ'անցնի:

Այս է գնահատումը որ կը հրապարակեն յունական թերթերը, դիտել տալով թէ Սամարաս եւ Վենիզելոս կ'ուզեն օգտագործել «Ոսկեայ արշալոյս»ի խմբակցութենէն եկած հրաժարականները, իրենց ի նպաստ առաւելագոյն խորհրդարանական ուժ համախմբելու նպատակով:

Այսպէս, ըստ երեւոյթին, անոնք պիտի որոշեն արագօրէն ընտրութիւններ կազմակերպել, երբ դեռ թարմ են ֆաշիստական գործունէութեամբ խմբաւորման դէմ տպաւորութիւնները: Այս ուղղութեամբ նոյնիսկ թուական կը յայտարարեն որոշ թերթեր, Նոյեմբերը ամէնէն հաւանական թուականը համարելով:

Շատեր ընտրութիւններու կայացման պարագան ուղղակիօրէն կը կապեն նաեւ վարչապետ Անտոնիս Սամարասի Նիւ Եորքէն վերադարձին եւ Պերլինէն ու Պրիւքսէլէն իր քաղած պատգամներուն հիմամբ:

Շատ կարեւոր կը նկատուի նաեւ Յունաստանի կողմէ Եւրոպական Միութեան նախագահութիւնը ստանձնելու փաստը, որ կը սկսի Յունուար 1ին եւ կը լրանայ Յունիսին, եւ պէտք է կատարուի անխափան պայմաններու տակ: