Աշխարհահռչակ կոստանդնուպոլցի լուսանկարիչ, «Ստամբուլի աչքը»՝ Արա Կիւլերը ճնշման կտրուկ տատանումներու պատճառով տեղափոխուած է հիւանդանոց:

Երկար ժամանակ է, որ Արա Կիւլերը կը տառապի երիկամային անբաւարարութենէ: Յունուար 16-ին ան հերթական անգամ գնաց դիալիզի, սակայն ճնշման հետ կապուած խնդիրներու պատճառով տեղափոխուած է վերակենդանացման բաժին, ուր կատարուած է դիալիզը, կը յայտնէ Anadolu գործակալութիւնը:
Արա Կիւլեր աշխարհահռչակ պոլսահայ լուսանկարիչ-լրագրող է: Յաճախ անոր կը դիմեն «Ստամբուլի աչք» կամ «Ստամբուլի լուսանկարիչ» մականուններով: Ծնած է Պոլիս՝1928-ին, հայերու ընտանիքի մէջ: 1950-էն սկսած է աշխատիլ «Yeni Istanbul» թերթին մէջ՝ զուգահեռ ուսանելով Պոլսոյ համալսարանի տնտեսագիտական ճիւղին մէջ: Որոշ ժամանակ ետք տեղափոխուած է «Հիւրիեթ» թերթի խմբագրութիւն: Կիւլերը լուսանկարած է Ուինսթոն Չերչիլին, Մարիա Քալլասին, Ջոն Բերգերին, Բերնարդ Ռասսելին, Սալվադոր Տալիին, Փապլօ Փիքասոյին, Ինտիրա Կանտիին, Սերգէյ Փարաջանովին եւ ուրիշներ: Պարգեւատրուած է ֆրանսական «Legion d’ honneur», 2005թ.՝ թրքական «Grand prize of culture and art», 2009թ.՝ Նիւ Եորքի «Lucie Award» մրցանակներով:
2013-ի ամրան Արա Կիւլերը Հայաստան գտնուեցաւ: Ազգային պատկերասրահին մէջ անոր «Բարեւ ձեզ» խորագրով ցուցահանդէսն էր, ուր ներկայացուած էր աշխարհի տարբեր վայրերու մէջ մօտ 100 լուսանկար: Այժմ Ուաշինգտոնի մէջ ընթացքի մէջ է «Ուշադրութեան կենտրոնին վրայ Արա Կիւլերի Անատոլիան է» խորագրով ցուցահանդէսը, որ կը գործէ մինչեւ Մայիս 4: