Սալմաստ գաւառի Փայաջուկ գիւղէն անմահանուն վիպասան Րաֆֆիի կնոջ սեփական գրադարանին պատկանած «Խենթը» հատորը, Ատրպատականի Հայոց թեմի առաջնորդ՝ Գերպ. Տ. Գրիգոր Ծ. Վրդ. Չիֆթճեանի նուիրուեցաւ՝ տէր եւ տիկին Յակոբ եւ Մարիլին Արշակունիներու կողմէ, որոնք հատորը Լոս Անճելոսէն ուղարկեցին Ատրպատականի Ազգ. Առաջնորդարան, անձնական բարեկամութիւն ունենալով թեմակալ առաջնորդին հետ:
Հնատիպ «Խենթը» հատորը երկրորդ տպագրութիւնն է, լոյս տեսած 1890 թուին Մոսկուայի մէջ, Մկրտիչ Բարխուդարեանի տպարանէն: Գիրքի տիտղոսագթերթը ունի հետեւեալ բովանդակութիւնը. «ՐԱՖՖԻ / ԽԵՆԹԸ / ԱՐԿԱԾՆԵՐ ՎԵՐՋԻՆ ՌՈՒՍ-ԹՈՒՐՔԱԿԱՆ ՊԱՏԵՐԱԶՄԻՑ / ՋԱԼԱԼԷԴԴԻՆ / ՄԻ ՊԱՏԿԵՐ ՆՐԱ ԱՐՇԱՒԱՆՔԻՑ / ԵՐԿՐՈՐԴ ՏՊԱԳՐՈՒԹԻՒՆ / ՄՈՍԿՈՒԱ / ՏՊԱՐԱՆ ՄԿՐՏԻՉ ԲԱՐԽՈՒԴԱՐԵԱՆԻ / 1890»:
Իր ամուսնոյն մահէն (1888) երկու տարի վերջ երկրորդ հրատարակութեան արժանացած անոր «Խենթը» հատորը, վստահաբար մեծ մխիթարութիւն եղաւ այրի տիկին Աննա Րաֆֆիին եւ անոր երկու զաւակներուն՝ Արամ եւ Արշակ Րաֆֆի-ներուն համար:
Սոյն հնատիպ հատորի տիտղոսաթերթին վրայ գտնուող կնիքը, Րաֆֆիի կնոջ՝ Աննայի անձնական գրադարանի կնիքն է, որ ունի հետեւեալ բովանդակութիւնը. «ԱՅՐԻ ԱՆՆԱ ՐԱՖՖԻ ՄԵԼԻՔ ՅԱԿՈԲԵԱՆ»: Ամուսնոյն մահէն ետք ան պատրաստել տուած է այս կնիքը, ու անով կնքած իր սեփական գրադարանին գիրքերը, որոնց մէջ մեծ մխիթարութեամբ ու սիրով տեղադրած է նաեւ այս գիրքը՝ «Խենթը»:
Տէր եւ տիկին Արշակունիները սոյն գիրքը գնած էին Լոս Անճելոսի մէջ շաբաթավերջերուն մայթերու վրայ ցուցադրուող շարժուն շուկաներէն…: Գիրքը այժմ իր հանգիստը գտած է Րաֆֆիի ծննդավայր երկրին եւ անոր պատկանած Ատրպատականի Հայոց թեմին մէջ: