Վրաստանի մէջ Հոկտեմբեր 27-ին կայացած նախագահական ընտրութիւնները վերջ գտան առաջին փուլով՝ ինչպէս նախորդ բոլոր հինգը: Վրաստանի չորրորդ նախագահը Կէորկի Մարկվելաշվիլին է՝ մասնագիտութեամբ փիլիսոփայ, որ մինչեւ վերջերս այնքան ալ յայտնի քաղաքական գործիչ չէր ոչ
Վրաստանի մէջ, ոչ ալ՝ դուրսը:
Կէորկի Մարկվելաշվիլի շնորհակալութիւն յայտնեց վարչապետ Պիձինա Իւանիշվիլիին: Վերջինս էր, որ Մարկվելաշվիլի թեկնածութիւնը առաջադրեց «Վրացական երազանք» դաշինքէն: Իւանիշվիլիի քաղաքական եւ ֆինանսական աջակցութեան շնորհիւ հնարաւոր եղաւ Մարկվելաշվիլիի ընտրութիւնը, որ կարելի է ըսել՝ Վրաստանի նախագահի պաշտօնին հասաւ անյայտութենէն:
44-ամեայ Մարկվելաշվիլին փիլիսոփայութեան դոկտոր է: Եղած է լեռնագնացներու ուղեկցող եւ թարգմանիչ, ապա հիմնած է Վրաստանի հանրային գործերու ինստիտուտը՝ յայտնի GIPA-ն: Հանգուցեալ վարչապետ Զուրապ Ժուանիայի քաղաքական խումբէն էր:
Ընտրութիւններու նախնական արդիւնքերով՝ Մարկվելաշվիլի հաւաքած է քուէներուն աւելի քան 60%-ը: Անոր հիմնական մրցակիցը՝ Դաւիթ Պաքրաձէն, ստացած է քուէներուն շուրջ 20%-ը: Երրորդ տեղը խորհրդարանի նախկին նախագահ Նինօ Պուրջանաձէն է: