Երուսաղէմի Հայոց պատրիարքարանին մէջ Յունուար 23-ին ընտրուած են պատրիարքի հինգ թեկնածուները: Այս մասին, ըստ Armenpress.am-ի, հաղորդած է երուսաղէմի Սրբոց Յակոբեանց միաբանութեան անդամ Հայր Կորիւն վարդապետ Պաղտասարեան:

Գաղտնի քուէարկութեամբ ընտրուած են Երուսաղէմի Հայոց պատրիարքարանի Լուսարարապետ Նուրհան արքեպիսկոպոս Մանուկեանը (21 ձայն), պատրիարքի տեղապահ Արիս արքեպիսկոպոս Շիրվանեանը (16 ձայն), Պրազիլի Հայոց թեմի առաջնորդ Տաթեւ արքեպիսկոպոս Ղարիպեանը (18 ձայն), Սրբոց Յակոբեանց միաբանութեան անդամ Սեւան արքեպիսկոպոս Ղարիպեանը (15 ձայն) եւ Արժանթինի Հայոց թեմի առաջնորդ Գիսակ արքեպիսկոպոս Մուրատեանը (15 ձայն): 

Վաղը Ուրբաթ 25 Յունուարին պատրիարքարանին մէջ կանոնադրական բարեփոխումներու մասին ժողով պիտի գումարուի:

Ընտրութեան երկրորդ փուլով պատրիարք պիտի ընտրուի նշեալ հինգ թեկնածուներէն մէկը՝ ձայներու բացարձակ մեծամասնութեամբ՝ կէսէն աւելի, իսկ պատրիարքի գահակալման օրը պիտի որոշուի ընտրութենէն ետք

Երուսաղէմի Հայոց պատրիարքի ընտրութեան մասնակցելու իրաւունք ունին միայն միաբանութեան կուսակրօն անդամները՝ 33 հոգեւորական: Պատրիարքի վերջնական ընտրութիւնը պիտի կայանայ երկու հանգրուանով: Առաջին հանգրուանին, գաղտնի քուէարկութեամբ կ՛ընտրուին հինգ թեկնածուներ: Համաձայն Երուսաղէմի ուխտի կանոնադրութեան (1882)՝ պատրիարքի թեկնածու կրնան ըլլալ Սրբոց Յակոբեանց միաբանութեան մէջ 35 տարի ամբողջացուցած վարդապետներ ու եպիսկոպոսներ:

Երուսաղէմի պատրիարքի աթոռը թափուր կը մնայ լուսահոգի Թորգոմ արք. Մանուկեանի (1990-2012) վախճանումէն ի վեր: