Կիպրոսի Հանրապետութեան նախագահ՝ Տիմիթրիս Խրիսթոֆիաս, Յունուար 10-ի երեկոյեան այցելեց Անթիլիասի Մայրավանք։
Նախագահին կ'ընկերանար նախարարներէ ու երեսփոխաններէ բաղկացած 18 հոգինոց պատուիրակութիւն մը: Նախագահն ու Վեհափառը առանձին հանդիպում մը ունեցան, որու ընթացքին արծարծուեցան Լիբանանի ու Կիպրոսի, ինչպէս նաեւ Հայաստանի ու Կիպրոսի յարաբերութեանց եւ Կիպրահայ համայնքին եւ ազգային պահանջատիրութեան առընչուած հարցեր:
Ապա Վեհարանի դահլիճին մէջ Վեհափառ հայրապետն ու նախագահը ողջոյնի խօսքեր արտասանեցին: Իր խօսքին մէջ, Վեհափառը անդրադարձաւ Կիլիկեան շրջանէն սկսեալ հայ եւ կիպրացի ժողովուրդներուն միջեւ գոյութիւն ունեցող սերտ յարաբերութեան՝ քաղաքական, տնտեսական, մշակութային, կրօնական եւ այլ մարզերէն ներս:
Ապա Վեհափառը Կիլիկեան «Իշխան»ի կարգի շքանշանով պարգեւատրեց Կիպրոսի Հանրապետութեան նախագահը:
Նախագահ Խրիսթոֆիաս իր կարգին անդրադարձաւ հայ եւ յոյն ժողովուրդներու դարաւոր բարեկամութեան, ապա լայնօրէն խօսեցաւ Թուրքիոյ կողմէ Կիպրոսի կղզիին գրաւման մասին: Ան իր բարձր գնահատանքը յայտնեց Կիպրոսի հայութեան գծով, շեշտելով թէ պետութիւնը պիտի շարունակէ հետապնդել գրաւեալ կալուածներու հարցը: