Բերիոյ թեմի Ազգային առաջնորդարանի բանբեր Ժիրայր Ռէյիսեան «Ազդակ»ին խօսելով յայտնած է որ երկու օրէ ի վեր կացութիւնը աւելի հանդարտ է, հակառակ անոր որ քաղաքի ծայրամասային թաղամասերուն մէջ կռիւները կը շարունակուին:
Ռէյիսեան դիտել տուաւ, որ այն քաղաքներուն մէջ ուր կացութիւնը աւելի կայուն է, սկսած է ուսումնական տարին, ինչպէս՝ Լաթաքիոյ եւ Քեսապի մէջ: Դպրոցներու հոգաբարձութիւնները եւ տնօրէնութիւնները պատրաստութեան մէջ են յառաջիկայ օրերուն Հալէպի մէջ եւս վերսկսելու ուսումնական կեանքը՝ որոշ յարմարեցումներով: