Սերժ Սարգսեան Լոնտոնի Մէջ Պիտի Մասնակցի Ողիմպիական Խաղերու Բացման Արարողութեան

Մեծն Բրիտանիոյ մայրաքաղաքը պատրաստ է դիմաւորելու Ողիմպիական 30-րդ մրցումները: Պաշտօնական բացումը տեղի կ'ունենայ վաղը Յուլիս 27-ին:

Հրաւիրուած այլ նախագահներու կարգին, ՀՀ նախագահ Սերժ Սարգսեան եւս ներկայ պիտի գտնուի  ողիմպիական խաղերու բացման արարողութեան: Իրեն կ'ընկերակցի Գագիկ Ծառուկեանը՝ իբրեւ Հայաստանի Ողիմպիական կոմիտէի նախագահող: Ի դէպ, այս օրերուն Հայաստանի ողիմպիական խումբը հանդիսաւոր կերպով Լոնտոն ճանապարհելու արարողութիւն տեղի չունեցաւ, որովհետեւ մեր ողիմպիական մարզիկները եւրոպական երկիրներու մէջ ուսումնամարզական փորձերու մէջ էին եւ այնտեղէն մեկնած են Լոնտոն:

Ողիմպիական. Հայաստանի մարզիկներու մասնակցութեան ժամանակացոյցը

ՀԱՕԿ-ի պաշտօնական կայքը հրապարակեց Հայաստանի մարզիկներու ելոյթներու ժամանակացոյցը ամառնային Ողիմպիական խաղերուն, որոնք կը կայանան Յուլիս 27-էն Օգոստոս 12:
ՅՈՒԼԻՍ 27.-  Խաղերու բացման հանդիսաւոր արարողութիւն
ՅՈՒԼԻՍ 28.-  Յովհաննէս Դաւթեան, ճիւտօ՝ 60 կգ
                      Արթուր Դաւթեան, մարմնամարզութիւն
                      Նորայր  Բախտամեան,  10 մ . օդամղիչ ատրճանակ
                      Անդրանիկ Յակոբեան, բռնցքամարտ
ՅՈՒԼԻՍ 29.-   Արմէն Նազարեան, ճիւտօ՝  66 կգ
                       Անահիտ Բարսեղեան , 100 մ . թիկնալող
ՅՈՒԼԻՍ 31.-   Միքայէլ Քոլոյեան , 100 մ . ազատ լողաոճ
                       Առաքել Միրզոյեան,  ծանրամարտ, 69 կգ
ՕԳՈՍՏՈՍ  1.-    Մելինէ Դալուզեան, ծանրամարտ, 60 կգ
                         Տիգրան Մարտիրոսեան  ծանրամարտ, 77 կգ
ՕԳՈՍՏՈՍ 3 .-  Արա Խաչատրեան, ծանրամարտ, 85 կգ  
                          Վարդան Փահլեւանեան եւ Արսէն Սարգսեան՝ հեռացատկ
ՕԳՈՍՏՈՍ 4.-   Նորայր Վարդանեան, ծանրամարտ, 94 կգ
ՕԳՈՍՏՈՍ 5.-   Նորայր Բախտամեան, ատրճանակ՝ 50 մ
                         Արսէն Ջուլֆալակեան  հ / հ ըմբշամարտ, 74 կգ
                         Հռիփսիմէ Խուրշուդեան, ծանրամարտ՝  + 75 կգ  
ՕԳՈՍՏՈՍ 6.-   Եուրի Պատրիկեւ, հ / հ ըմբշամարտ, ծանր քաշ 
ՕԳՈՍՏՈՍ 7.-  Յովհաննէս Վարդերեսեան՝ 66 կգ  եւ Արթուր Ալեքսանեան՝ 96 կգ, երկուքն ալ հ/հ ըմբշամարտ
ՕԳՈՍՏՈՍ 8 .-  Մելիք Ջանոյեան, նիզակի նետում 
ՕԳՈՍՏՈՍ  9.-   Քրիստինէ Յարութիւնեան, նիզակի նետում    
ՕԳՈՍՏՈՍ 10.-  Արման Երեմեան, թեքվոնտօ, 80 կգ
                          Միհրան Ջաբուրեան,  ազատ ըմբշամարտ, 55 կգ 
ՕԳՈՍՏՈՍ 11.-   Հաջիմուրադ   Նուրմոհամեդով, ազատ ըմբշամարտ, 84 կգ 
ՕԳՈՍՏՈՍ  12 .-  Դաւիթ Սաֆարեան, ազատ ըմբշամարտ, 66 կգ
Նոյն օրը՝ Օգոստոս 12 -ին,  տեղի կ'ունենայ նաեւ խաղերու փակման  հանդիսաւոր արարողութիւնը:

Հայաստանի Հանրապետութեան մասնակցութիւնը
1992-2008 Ողիմպիական վեց խաղերու ընթացքին

1991ին, Հայաստան անկախ Հանրապետութիւն հռչակուելէ ետք՝  վեցերորդ անգամն է,  որ մասնակցութիւն կը բերէ ողիմպիականներուն։ 1992ին Պարսելոնայի Ողիմպիական խաղերու մէջ Հայաստան ներկայացուած էր ԱՊՀի միասնական պատուիրակութեան մէջ։

25րդ Ողիմպիական Խաղեր ¬1992 Պարսելոնա (Սպանիա)
Խաղերը սկսան 25 Յուլիսին։
Հայաստան, ԱՊՀ ի միացեալ ազգային խումբէն ներս շահեցաւ 3 ոսկեայ եւ 1 արծաթեայ մետալ։
Մնացական Իսկանտարեան յունահռոմէական ըմբշամարտի մրցումներուն մէջ (75 քկ.) ողիմպիական ախոյեան հռչակուեցաւ։
Իսրայէլ Միլիտոսեանն ալ 70 քկ. դասաւորման մէջ ծանրաբարձութեան ախոյեան դարձաւ։
Երրորդ ոսկին բերաւ Հրաչեայ Պետիկեան, որ հրաձգութեան կարճափող հրացանի երեք դիրքերէն լաւագոյն արդիւնքը ցոյց տուաւ ու ողիմպիական ոսկիով վերադարձաւ Հայաստան։
Արծաթեայ մետալակիր դարձաւ յունահռոմէական ըմբշամարտի մարզիկ Ալֆրէտ Տէր Մկրտչեան։
Հայաստանի կազմէն Սօս Հայրապետեանն ալմականախաղի մէջ, որպէս ԱՊՀի ազգային խումբի անդամ 10րդ հանդիսացաւ։

26րդ Ողիմպիական Խաղեր -1996 Աթլանտա (Ամերիկա)
Մրցումները սկսան 19 Յուլիսին։
Հայաստան շահեցաւ 1 ոսկի եւ 1 արծաթեայ մետալ։ Մետալներու հաշուարկով տեղ գրաւեց 47րդ կարգի վրայ։
Արմէն Նազարեան յունահռոմէական ըմբշամարտի 60 քկ. դասաւորման մէջ ողիմպիական ոսկի շահեցաւ։
Արծաթեայ մետալի արժանացաւ Արմէն Մկրտչեան, որ ազատ ոճի ըմբշամարտիկ էր 52 քկ. դասաւորման մէջ։
Ընդհանուր առմամբ Հայաստան 32 մարտիկներով (30 այր եւ 2 կին) մասնակցեցաւ խաղերուն եւ պայքարեցաւ 11 մարզաձեւերու մէջ .¬ Աթլէթիզմ, կռփամարտ, ըմբշամարտ, թէնիս, լող, խճուղային հեծանիւավազք, ծանրաբարձութիւն, հրաձգութիւն, ժիւտօ, մարմնամարզ, ջրացատք։

27րդ Ողիմպիական Խաղեր - 2000 Սիտնի (Աւստրալիա) 
Բացումը կատարուեցաւ 15 Սեպտեմբերին։
Հայաստան միակ մետալ մը նուաճեց, այդ  ալ  պրոնզեայ եւ մետալներու թիւով 74րդ կարգի վրայ էր։
Հայաստանին պրոնզը բերաւ Արսէն Մելիքեան, որ ծանրաբարձութեան 77 քկ.դասաւորման մէջ երկամարտի արդիւնքով 365 քկ. արդիւնք ցոյց տուաւ ու արժանացաւ երրորդութեան։
Հայաստանի պատուիրակութիւնը կը բաղկանար 25 մարզիկներէ, 10 մարզաձեւերու մէջ.¬ Աթլէթիզմ, կռփամարտ, ըմբշամարտ, թէնիս, թիավարութիւն, լող, ծանրաբարձութիւն, հրաձգութիւն, ժիւտօ, ջրացատք։

28րդ Ողիմպիական Խաղեր - 2004 Աթէնք (Յունաստան) 
Բացումը կատարուեցաւ 13 Օգոստոսին։
Հայաստան առանց մետալի վերադարձաւ այդ ողիմպիականներէն։
Մասնակցեցան 18 մարզիկներ (16 այր եւ 2 կին) որոնք պայքար տարին 8 մարզաձեւերու.¬ Աթլէթիզմ, կռփամարտ, ըմբշամարտ, թէնիս,  լող,  ծանրաբարձութիւն, հրաձգութիւն, ժիւտօ։

29րդ Ողիմպիական Խաղեր - 2008 Փէքին (Չինաստան) 
Բացումը կատարուեցաւ 8 Օգոստոսին։
Հայաստան պրոնզեայ վեց մետալներով վերադարձաւ խաղերէն ու մետալներու հաշուարկով 37րդ տեղը գրաւեց։
Ռոման Ամոյեան եւ Եուրի Փաթրիքէեւ յունահռոմէական ոճի ըմբշամարտի մէջ երրորդ տեղը գրաւեցին։
Հրաչիկ Ջաւախեան պրոնզեայ մետալակիր հռչակուեցաւ կռփամարտի 63 քկ. դասաւորման մէջ։
Ծանրաբարձիկներ Տիգրան Մարտիրոսեան (69 քկ.), Գէորգ Դաւիթեան (77 քկ.) եւ Տիգրան Վ. Մարտիրոսեան (83քկ.) երկամարտի արդիւնքներով պրոնզ մետալ շահեցուցին Հայաստանի պատուիրակութեան։
Ընդհանուր առմամբ Հայաստան 25 մարզիկներով (23 այր եւ 2 կին) մասնակցեցաւ խաղերուն եւ պայքարեցաւ 7 մարզաձեւերու մէջ .¬ Աթլէթիզմ, կռփամարտ, ըմբշամարտ, լող, ծանրաբարձութիւն, հրաձգութիւն, ժիւտօ։