ՆԻՒ ԵՈՐՔ - Աթոմ Էկոյեանի Բեմադրած Օփերայի Առաջին Ներկայացում
Նիւ Եորքի «Լինքըլն» կեդրոնի փառատօնի ծիրէն ներս, պիտի ներկայացուի քանատահայ Աթոմ Էկոյեանի ներկայացումը՝ իր «Ֆենկ եի թինկ» օփերային բեմադրութեան:
Օփերան կը պատմէ չինական խան արքայական ցեղի ժամանակաշրջանին ապրած առասպելական պալատական գեղուհի Տիաօ Չանի՝ սիրոյ համար ծաւալած պայքարին մասին: Կ՛արծարծուին սիրոյ, քաղաքական մեքենայութիւններու եւ կաշառակերութեան նիւթերը:
--------------------------------------------------------
ԼՈՍ ԱՆՃԵԼԸՍ - «Ներսէս Շնորահալի» Շքանշանով Պարգեւատրուեցաւ Տոքթ. Ֆրիտա Ճորտընը
ՊԸՐՊԵՆՔ.- Կիրակի, Յուլիս 8ին, առաջնորդանիստ Սրբոց Ղեւոնդեանց Մայր տաճարին մէջ Ս. պատարագ մատոյց Խաժակ քհնյ. Շահպազեան: Արարողութեանց հանդիսապետեց թեմակալ առաջնորդ Յովնան արք. Տէրտէրեան:
«Հայ Մեր»էն առաջ, Գարեգին Բ. Ամենայն հայոց կաթողիկոսին առաքած Սրբատառ կոնդակը թափօրով դէպի խորան առաջնորդեց Սիփան Ա. քհնյ. Մխսեանը, մինչ երգչախումբը կ՛երգէր «Ուրախ Լեռ» շարականը: Կոնդակը կարդաց պատարագիչ տէր հայրը: Սոյն կոնդակով, առաջնորդ Տէրտէրեան Գարեգին Բ. Ամենայն հայոց կաթողիկոսին կողմէ «Ս. Ներսէս Շնորհալի» շքանշանով պիտի պարգեւատրէր Ոսկրածուծի նուիրատուներ ապահովող յանձնախումբի նախագահ տոքթ. Ֆրիտա Ճորտընը:
Առաջնորդը կատարեց շքանշանին պարգեւատրումը, ապա շնորհաւորեց տոքթ. Ֆրիտա Ճորտընը, որ յանձնախումբի անդամներուն հետ միասին լծուած էր ոսկրածուծի նուիրատուներ ապահովելու սեպուհ առաքելութեան, եւ հայ համայնքին մատուցած բարեսիրական ծառայութեանց համար յարատեւ յաջողութիւն մաղթեց անոր: Առաջնորդը գոհունակութեամբ յայտնեց, թէ այդ յանձնախումբին կատարած մարդասիրական առաքելութիւնը ո՛չ միայն Հայաստանի մեր հայրենակիցներուն համար է, այլ՝ համամարդկային:
Առաջնորդ Տէրտէրեանի քարոզի նիւթն էր Քրիստոսի կողմէ հացին առաջին բազմացումը: Ան իր քարոզին մէջ ըսաւ. «Եթէ ուշադիր կարդանք այս պատմութիւնը, առաջին անգամ, որ բոլորիս է ուղղուած, այն է՝ գութ, կարեկցութիւն ցուցաբերենք ժողովուրդի նկատմամբ, մէկս միւսին հանդէպ, բայց ի մասնաւորի՝ հիւանդներու նկատմամբ: Յիսուս այդ կատարեց իր աշակերտներու ներկայութեան, երբ իրեն հետեւող բազմութեան նկատմամբ գութ եւ կարեկցութիւն ցուցաբերեց եւ բուժեց հիւանդները: Այս պատկերը մեզի կը հաղորդէ բարոյական կարեւոր պատգամ մը, որ նմանուինք Քրիստոսի՝ այնպէս, ինչպէս Յիսուս գթաց ժողովուրդին եւ բժշկութիւն կատարեց, ապա նոյնը կատարենք նաեւ մենք: Ուրիշ խօսքով՝ անտարբեր չըլլանք եւ չանտեսենք այն շնորհը, որ Աստուծմէ մեզմէ իւրաքանչիւրին տրուած է, եւ այն ժամանակ պիտի տեսնենք, թէ ինչպէս կեանքեր կը կարողանանք կերպարանափոխել»:
Ս. պատարագին եւ անոր յաջորդող հիւրասիրութեան ներկայ գտնուեցաւ նաեւ Լոս Անճելըսի մէջ Հայաստանի Հանրապետութեան գլխաւոր հիւպատոս Գրիգոր Յովհաննիսեան:
---------------------------------------------------------
ԱՐԱՐԱՏԷՆ ՔԻԼԻՄԱՆՃԱՐՕ
Սփիւռքահայու մարմաջ, կամք, բերկրանք…բարձրանալու լեռն ու գագաթն ի վեր: …Եւ այդ ալ, ոչ թէ միայն դէպի Արարատ, այլ նաեւ այլ ցամաքամաս եւ այլ բարձունք:
Արդարեւ, քանի մը հայորդիներ որոնք արդէն իսկ Արարատին գագաթը նուաճելու առիթը ունեցած էին, այս անգամ մեկնած էին Ափրիկէի խորերը, նուաճելու համար, այդ ցամաքամասի բարձրագոյն գագաթը՝ Քիլիմանճարօն: Քանի մը տարի առաջ, հայրենի գրագէտ Զoրի Բալայեան եւ ընկերներ, իրենց «Կիլիկիա» նաւուն հետ, աշխարհի չորս կողմերը նաւարկած էին: Այս լեռնագնացներն ալ…Կոստան Զարեանի հետքերով, իրենց «նաւ»ը` կիզակէտը լեռներու վրայ ուղած են: Այսպէս, ութ հայորդիներ այդ սխրագործութիւնը կատարեցին, պայքարելով բնութեան ստեղծած դժուարութիւններուն դէմ:
--------------------------------------------------------
ԱՐԺԱՆԹԻՆ - «Անմահները» Հատորի Շնորհահանդէս
Հովանաւորութեամբ թեմի առաջնորդ Յովնան արք. Տէրտէրեանի, 28 Յունիսին առաջնորդարանի «Գալայճեան» սրահին մէջ տեղի ունեցաւ մշակութաբան Ալիս Նաւասարգեանի «Անմահները» գիրքին շնորհահանդէսը:
Գիրքը ներկայացուց առաջնորդարանի գրադարանի պատասխանատու-տնօրէն եւ միջեկեղեցական եւ միջկրօնական ժողովներու առաջնորդին ներկայացուցիչ Հայկ Մատոյեան, որ յայտնեց, թէ գիրքը 530 էջերէ կազմուած աշխատութիւն մըն է, որ բաղկացած է հիմնական 2 մասերէ. ա) Հայաստանի ընդհանուր պատկերը բ) Պարսկաստանի հայ գաղութին մէջ իրենց անուրանալի հետքը ձգած մեծանուն անձերու մասին: Ան յայտնեց, թէ գիրքին մէջ, Պարսկաստանի տարածքի մասին տեղեկութիւններու կողքին, կան նաեւ Հնդկաստանի, Ռուսիոյ, ինչպէս նաեւ Հայաստանի եւ տարբեր երկիրներու մէջ իրենց ազդեցութիւնը ձգած իրանահայերու մասին:
Ան նկատել տուաւ, որ գիրքը փաստավաւերագրական աշխատութիւն մըն է՝ նուրբ եւ կշռադատուած վերլուծումներով եւ կը բովանդակէ հանրագիտական ծաւալուն նիւթեր:
Գնահատական խօսքով հանդէս եկաւ առաջնորդը, որ իր խօսքին մէջ նշեց, թէ արուեստը եւ մշակոյթը մարդուն կեանքը հրաշագործող բացառիկ շնորհներն են: Խմբագիր Օշին Քէշիշեան կատարեց գիրքին գինեձօնը:
--------------------------------------------------------
ՀՆԴԿԱՍՏԱՆ - Մարդասիրական ճեմարանի 7 աշակերտներ մկրտուեցան
2012 թուականի Յուլիս 15-ին Մայր Աթոռ Սուրբ Էջմիածնի հովանիին տակ գործող Հայոց մարդասիրական ճեմարանի (Կալկաթա, Հնդկաստան) աշակերտները եւ ուսուցիչները, Կալկաթայի հայ համայնքը նշեցին՝ Յիսուս Քրիստոսի Պայծառակերպութեան տօնը (Վարդավառ), որը Հայ Առաքելական եկեղեցւոյ հինգ տաղաւար տօներէն մէկն է:
Կալկաթայի Սուրբ Նազարէթ Մայր եկեղեցւոյ մէջ հնդկահայոց հոգեւոր հովիւ, Հայոց մարդասիրական ճեմարանի կառավարիչ Տէր Խորէն վրդ. Յովհաննիսեանը մատուցեց Սուրբ Պատարագ: Սուրբ պատարագի աւարտին կատարուեցաւ Սուրբ Մկրտութեան եւ Սուրբ Դրոշմի կանոնները:
Տաղաւար տօնը կրկնակի օրհնաբեր էր: Նախ, որ օրը յատկանշական էր պայծառակերպութեան հրաշազարդ խորհուրդով եւ յիշարժան, որ Մարդասիրական ճեմարանի մեծ ընտանիքի հայաստանցի 7 սաներ՝ Ալվարդ Նիկողոսեանը, Մարիամ Աւետիսեանը, Գէորգ Մկրտչեանը, Սիրվարդ Յովհաննիսեանը, Գեղամ Բադալեանը, Աւետիս Աւետիսեանը եւ Տաթեւ Եղոյեանը մկրտուեցան: Նորոգ մկրտեալներուն կնքահայրեր դարձան Մարդասիրականի աւագ ուսանողները:
Օրուայ առիթով ճեմարանի տեսչութիւնը երեխաներու համար կազմակերպած էր տօնական հիւրասիրութիւն. ապա երեխաներու խնամակալ Հայր Խորէնը անոնց յանձնեց խաչեր եւ նուէրներ:
--------------------------------------------------------
ՅՈՐԴԱՆԱՆ - «Հայաստանի Մշակոյթի Օր»ուան նուիրուած ձեռնարկներ
Յորդանանի մէջ «Հայաստանի մշակութային օրեր» շրջագիծէն ներս 25 Յունիսին, Ամմանի Մշակոյթի թագաւորական կեդրոնին մէջ տեղի ունեցաւ Գեղագիտութեան մանկական կեդրոնի տնօրէն, արուեստագէտ Արմենուհի Յարութիւնեան-Իգիթեանի փակցանկարներու ցուցահանդէսի բացում:
Այնուհետեւ, նոյն սրահի գլխաւոր դահլիճին մէջ տեղի ունեցաւ մշակութային օրերու պաշտօնական բացումը: Ներկաները ունկնդրեցին հայ անուանի երգահան, Երեւանի պետական երա-ժշտանոցի փրոֆ. Ռուբէն Ալթունեանի ղեկավարած ժողովրդական գործիքներու խումբին եւ պատանի քանոնահար, միջազգային մրցանակներու դափնեկիր Նարեկ Կազազեանին ելոյթները:
26 Յունիսին հայ երաժիշտները Քարաք քաղաքի «Հասան» մշակոյթի կեդրոնին մէջ, հայ եւ յորդանանցի հանդիսատեսի ուշադրութեան ներկայացուցին հայկական ժողովրդական ու ազգագրական երգն ու պարը: Նոյն օրը, Ամմանի Մշակոյթի թագաւորական կեդրոնի սենեկային դահլիճին մէջ տեղի ունեցաւ Յորդանանի մէջ Հայաստանի դեսպան Արշակ Փոլատեանի «Հայ-արաբական պատմամշակութային յարաբերութիւնները» թեմայով դասախօսութիւնը՝ արաբերէնով:
Դասախօսութիւնը լայն արձագանգ գտաւ Յորդանանի գիտական եւ մշակութային շրջանակներուն մէջ եւ արտատպուեցաւ յորդանանեան կարգ մը լրատուամիջոցներու մէջ:
Յորդանանի կեդրոնական պատկերասփիւռի կայանին տուած երկու հարցազրոյցներուն ընթացքին Հայաստանի դեսպանը անդրադարձաւ հայ-արաբական յարաբերութիւններուն ու Յորդանանի մէջ մշակոյթի օրերու իրականացման:
29 Յունիսին Իրպիտ քաղաքի մշակոյթի պալատին մէջ, տեղի ունեցաւ Յորդանանի մէջ Հայաստանի մշակոյթի օրերու պաշտօնական փակման արարողութիւնը։
--------------------------------------------------------
ԱՐԺԱՆԹԻՆ - Փառատօն-Համերգ
Հովանաւորութեամբ քաղաքի կառավարութեան, Հայաստանի սփիւռքի նախարարութեան եւ Արժանթինի մէջ Հայաստանի դեսպանութեան, կազմակերպութեամբ ՀԲԸՄ Պուենոս Այրեսի մասնաճիւղին, 7 Յուլիսին տեղի ունեցաւ «Պուենոս Այրեսը կը տօնէ Հայաստանը» խորագրով փառատօն-համերգ:
Քաղաքի կեդրոնական փողոցներէն մէկուն մէջ տեղադրուած բեմին վրայ հանդէս եկան Նիւ Եորքի «Շուշի» պարախումբը, ամերիկահայ երաժիշտներ եւ երգիչներ, ինչպէս նաեւ՝ արժանթինահայ համայնքին մէջ ճանաչում ունեցող «Գայիանէ», «Մասիս» եւ «Նայիրի» համոյթները:
Այս շրջագիծին մէջ տեղի ունեցաւ հայ մշակոյթի, պատմութեան եւ խոհանոցին ծանօթացնող շարք մը տաղաւարներու բացում: