ՄՐՑԱՆԱԿ՝ ՀԱՅ ՏՆՏԵՍԱԳԷՏ ՏԱՐՕՆ ԱՃԷՄՕՂԼՈՒԻՆ

Թուրքիոյ՝ ծանօթ «Կալաթասարայ» երկրորդական վարժարանի շրջանաւարտներու «Կալաթասարայցիներու միութիւն»ը այս տարուան մրցանակը շնորհած է պոլսահայ անուանի տնտեսագէտ Տարօն Աճէմօղլուին։

Վարժարանի կայքէջին վրայ հրապարակուած յայտարարութեան մէջ նշուած է, որ նշեալ միութիւնը 1908 թուականէն ի վեր ամէն տարի մրցանակ կը յանձնէ միջազգային իրենց գործունէութեամբ Թուրքիոյ նպաստած քաղաքացիներուն։ Այս տարի արժանի դատուած է Աճէմօղլու: Յիշեցնենք, որ Տարօն Աճէմօղլու ծնած է Պոլիս՝ 1967ին։ 1986ին աւարտած է Կալաթասարայ վարժարանը, ապա՝ Լոնտոնի «Եորք» համալսարանը, եւ դոկտորան պաշտպանած է Լոնտոնի Տնտեսագիտութեան դպրոցին մէջ։ 1993ին միացած է Մասաչուսէցի համալսարանի դասախօսներու կազմին, 2000ին ստացած է փրոֆ.ի կոչում։ Ան, IDEAS/RePec                          տնտեսագիտական վերլուծական կազմակերպութեան կողմէ հրապարակուած տուեալներու համաձայն, աշխարհի վրայ ամենէն յաճախ  յիշուող 20 տնտեսա- գէտներու ցանկին մաս կը կազմէ՝ գրաւելով 8րդ տեղը, մինչ Նոպէլեան մրցանակի դափնեկիր փրոֆ. Փօլ Քրիւկման այդ ցանկին մէջ 13րդն է։  

-----------------------------------------------------------------
ՍՈՒՐԻՈՅ ՆՈՐ ԿԱՌԱՎԱՐՈՒԹԵԱՆ ՄԷՋ ՀԱՅԱԶԳԻ ՆԱԽԱՐԱՐ

Սուրիոյ նախագահ Պաշշար Ասատի թիւ 210 հրամանագիրով կազմուած է Սուրիոյ նոր կառավարութիւնը՝ Ռիատ Հիժապի գլխաւորութեամբ:
Կառավարութեան անդամ երեսուն նախարարներու շարքին է նաեւ հայազգի Նազիրա Ֆարահ Սարգիսը, որ նշանակուած է բնապահպանութեան նախարար:
Սարգիս ծնած է 1962-ին, Հալէպ: Ան մասնագիտութեամբ քիմիագէտ է, գիտութիւններու թեկնածու, աշխատած է Հալէպի համալսարանին մէջ:
Նշենք, որ ներքին գործոց, պաշտպանութեան եւ արտաքին գործոց նախարարները անփոփոխ մնացած են:

---------------------------------------------------------------
ԳԸՐՔ ԳՐԳՈՐԵԱՆ ԱՇԽԱՐՀԻ 344-ՐԴ ՄԻԼԻԱՌԱՏԷՐՆ Է

Ֆորպս հրապարակեց 2012-ի միլիառատէրերու ցանկը։ Այս տարուայ ցուցակին մէջ կը հաշուուին 1226 միլիառատէրեր՝ 4.6 թրիլիոն տոլար ընդհանուր կարողութեամբ։ Միլիառատէրերու թիւով առաջատար կը մնայ Ամերիկա՝ 425 մարդ, որուն կը յաջորդեն Ռուսաստան (96) եւ Չինաստան (95)։
Առաջատարը կրկին լիբանանեան ծագումով մեքսիքացի գործարար, 72-ամեայ Քարլոս Սլիմ Էլուն է: Ան 69 միլիառ տոլար հարստութիւն ունի։ Երկրորդն է Մայքրոսոֆթի հիմնադիր Պիլ Կէյթս՝ 61 միլիառ տոլար, իսկ երրորդը՝ ներդրումային հսկայ Ուորէն Պաֆէթ՝ 44 միլիառ տոլար։ Ամենահարուստ ռուսաստանցի գործարարը Ալիշէր Ուսմանովն է՝ 18.1 միլիառ տոլար գումարի  հարստութեամբ։ Ան աշխարհի մէջ 28-րդն է։
Ամերիկահայ միլիառատէր Գըրք Գրգորեան աշխարհի 344-րդ հարուստն է՝ 3.3 միլիառ տոլար հարստութեամբ։
Նշենք, որ 2008-ի վիճակագրութեամբ, Գրգորեան աշխարհի 41-րդ միլիառատէրն էր, սակայն Միացեալ Նահանգները հարուածած տնտեսական տագնապին պատճառով՝ ան կորսնցուց իր հարստութեան մէկ կարեւոր հատուածը: Ռուսահայ մեծահարուստներէն Դանիէլ Խաչատուրով 634-րդն է՝ 2 միլիառ տոլարով, Սամուէլ Կարապետեան աշխարհի մէջ 804-րդն է։

-------------------------------------------------------------

ՍԱՄՈՒԷԼ ԿԱՐԱՊԵՏԵԱՆ ԿԸ ԳՆԷ «ՐՈՊԷՐԹՕ ՔԱՒԱԼԼԻ»

Ռուսաստանի յայտնի հայ գործարար Սամուէլ Կարապետեանին պատկանող «Տաշիր» ընկերութիւններու խումբը մտադիր է գնել աշխարհահռչակ իտալական «Րոպէրթօ Քաւալլի» ապրանքները։ Այս մասին կը յայտնեն ռուսական լրատուամիջոցներ։ Կը նշուի, որ գործառնութիւնը իրականացնելու համար Սամուէլ Կարապետեան կը մտադրէ ծախսել 660 միլիոն տոլար։ Ռուսական ելեկտրոնային կայքէջ մըն ալ կը գրէ, թէ այս գործառնութիւնը կÿիրականանայ «Քասա Իտալիա» նախագիծի շրջագծով։ Այս նախագիծը կը պատկանի «Տաշիր»ի, ու կը ծրագրուի Մոսկուայի Կարմիր հրապարակի եւ Քրէմլինի հարեւանութեամբ կառուցել իտալական նորաձեւութեան նշանաւոր վաճառանիշներու խանութներ։ Իտալական թերթի մը տեղեկութիւններու համաձայն, Րոպէրթօ Քաւալլիի ղեկավարները կը քննեն նաեւ այլ ներդնողներու առաջարկները։
«Ֆորպս»ի ռուսական տարբերակի «Ռուսաստանի անշարժ կալուածներու արքաները» տարեկան  վարկանշային ցանկի մէջ Սամուէլ Կարապետեան երրորդն էր 2011-ին։ Ըստ ամսագրին, 2011-ին Կարապետեանի ընկերութեան եկամուտը կազմած է մօտաւորապէս 565 միլիոն տոլար։
«Ֆորպս» իր հրապարակման մէջ կը յիշեցնէ, որ հայ գործարարը աշխատանքի սկսած է Հայաստանի մէջ, սակայն յետոյ տեղափոխուած է Կալուգա, ուր զբաղած է հագուստեղէնի արդիւնաբերութեամբ։ Ներկայիս Կարապետեանի ընկերութիւնը բացի առեւտրական տարածքներու վարձակալութենէն, կը զբաղի նաեւ ուժանիւթի առեւտուրով եւ սննդեղէնի արտադրութեամբ։ Կարապետեանի ընկերութիւններու համախառն հասոյթը 2011-ին կազմած է 2.8 միլիառ տոլար։ 2011-ին մոսկուաբնակ հայ գործարարի ընկերութիւններու խումբը ձեռք բերած է բնակելի ու առեւտրային անշարժ կալուածներու եօթը տարածքներ, որոնց ընդհանուր ներդրումային արժէքը գերազանցած է մէկ միլիառ տոլարը։