Ներկայ եղան ՀՀ արտաքին գործոց նախարարը, Մեսեչուսեցի նահանգապետը եւ Պոսթընի քաղաքապետը
ԵՐԵՒԱՆ, «Թերթ».- ՀՀ արտաքին գործոց նախարար Էդուարդ Նալբանդեան, Մայիս 22ին մասնակցած է Պոսթնի կեդրոնը գտնուող Հայկական ժառանգութեան այգիի եւ Հայոց Ցեղասպանութեան զոհերու յիշատակը յաւերժացնող յուշակոթողի պաշտօնական բացման արարողութեան, եւ ըսած է, թէ հայը երբե՛ք չի մոռնար Հայոց Ցեղասպանութիւնը:
Ցեղասպանութեան յուշարձանին բացումը խորհրդանշող ժապաւէնը կտրած են ԱԳ նախարար Էդուարդ Նալբանդեան, Մեսեչուսեցի նահանգապետ Տեւալ Փաթրիք, քոնկրեսական Էտ Մերգի, Պոսթընի քաղաքապետ Թոմաս Մենինօ, Հայկական ժառանգութեան հիմնադրամի նախագահ Ճիմ Գալստեան եւ ԱՄՆ Արեւելեան ափի հոգեւոր առաջնորդներ:
Նախարար Նալբանդեան ընդգծած է նաեւ, թէ «մեր միասնական ջանքերը սկսում են արդիւնքներ տալ: Շուրջ մէկ դար Թուրքիայում փակի տակ գտնուող քննարկումը բացւում է: Այդ առումով, թուրք յայտնի գործարար Իցհակ Ալադոնի կոչը խորհըրդանշական է. նա ասում է. «Եկէ՛ք բարձրացնենք մեր ձայնը Անգարայի խորհըրդարանին մէջ, եկէ՛ք յարգենք անմեղ զոհերուն յիշատակը եւ առճակատուինք մեր անցեալի հետ»: Աւելի ու աւելի շատ մարդիկ են Թուրքիայում սկսում մտածել Ալադոնի պէս: Հայոց Ցեղասպանութեան յիշատակի արարողութիւնները Ստամբուլում եւ այլ թուրքական քաղաքներում դրա վկայութիւնն են»:
Այգիի բացման արարողութենէն առաջ, ԱԳ նախարար Էդուարդ Նալբանդեան եւ ՀՀ սփիւռքի նախարար Հրանոյշ Յակոբեան հանդիպած են Մեսեչուսեցի նահանգապետ Տեւալ Փաթրիքի հետ, որուն շնորհակալութիւն յայտնած են՝ Մեսեչուսեցի հայկական կազմակերպութիւններու նախաձեռնութիւններուն աջակցելուն համար: Հանդիպման ընթացքին հանգամանալից քննարկում տեղի ունեցած է հայ-ամերիկեան գործընկերութեան ամրապնդման առնչուող հարցերու եւ Հարաւային Կովկասի տարածաշրջանային խնդիրներու շուրջ:
Պոսթընի մէջ Հայաստանի արտաքին գործոց եւ սփիւռքի նախարարները այցելած են նաեւ Սուրբ Երրորդութիւն եկեղեցին, Հայկական մշակութային եւ կրթական կեդրոնը ու Հայկական թանգարանը: Հայաստանէն նշեալ ձեռնարկին ներկայ եղած են նաեւ սփիւռքի նախարար Հրանոյշ Յակոբեան եւ ԱՄՆի մօտ ՀՀ դեսպան Թաթուլ Մարգարեան: Նորաբաց այգին օրհնած են ամերիկահայ հոգեւորականները:
«Ասիկա մեր հայկական համայնքի եւ մեր նահանգի շփման հպարտ խորհրդանիշն է», այգիի բացման առիթով ըսած է Մեսեչուսեցի նահանգապետը:
«Հայրենիք» - Պոսթըն