Մեծի Տան Կիլիկիոյ Կաթողիկոսութիւնը, որ 2015ի Ապրիլին Սիսի կաթողիկոսարանի վերադարձի պահանջով դիմած էր Թուրքիոյ Սահմանադրական Դատարան, հայցի քննութեան պահանջով նոր դիմում մը ներկայացուցած է:
Դիմումով թրքական բարձրագոյն դատարանէն կը խնդրուի Կիլիկիոյ Կաթողիկոսութեան հայցը դիտարկել առաջնահերթութիւններու շարքին, քանի որ 10 ամիս առաջ ներկայացուած հայցը տակաւին քննութեան չէ առնուած: Ըստ թրքական «Haberturk» թերթի կայքին` 2րդ դիմումը ներկայացուած է 2 շաբաթ առաջ, Կիլիկիոյ Կաթողիկոսութեան փաստաբան Ճեմ Սոֆուօղլուի կողմէ:
Փաստաբան Սոֆուօղլու ըսած է, որ այս հայցը միտուած է գոյքի վերադարձին եւ անցեալի իրադարձութիւնները քննարկելու նպատակ չունի:
«Եթէ յաղթենք, պիտի դիմենք առաջին ատեանի դատարան, որպէսզի ի կատար ածուի Սահմանադրական Դատարանի որոշումը: Իսկ մեր հայցի մերժման պարագային պիտի դիմենք Մարդու Իրաւունքներու Եւրոպական Դատարան»,- ըսած է Սոֆուօղլու:
Վերջինս փոխանցած է նաեւ Մեծի Տան Կիլիկիոյ Կաթողիկոս Արամ Ա.ի ուղերձը, ուր մասնաւորապէս ըսուած է.- «Այս թեմայով Թուրքիոյ հետ սակարկութիւն պիտի չընենք: Չենք ընդունիր ո՛չ վերականգնելու, ո՛չ մեզի այցելութիւններ տրամադրելու եւ ոչ ալ հատուցման մէկ այլ տարբերակ: Միայն կը ցանկանք, որ ետ վերադարձուին այն գոյքերը, որոնք աւելի քան 800 տարի մեզի պատկանած են: Եթէ Թուրքիան կը ցանկայ մտերմանալ հայ ժողովուրդին հետ, ապա ասիկա ամենայարմար պահն է»: