ԱՆԹԻԼԻԱՍ - Կիրակի, 27 Նոյեմբերի երեկոյեան, Ն.Ս.Օ.Տ.Տ. Արամ Ա. կաթողիկոս մեկնեցաւ Կիպրոս, նախագահելու Միջին Արեւելքի Եկեղեցիներու Խորհուրդի համաժողովին:
Սոյն համաժողովին Մեծի Տանն Կիլիկիոյ կաթողիկոսութիւնը կը մասնակցի հնգանդամ պատուիրակութեամբ, որուն մաս կը կազմեն Կիպրոսի Հայոց թեմի Առաջնորդ Գերշ. Տ. Վարուժան Արք. Հերկելեան, Թեհրանի հայոց թեմի Առաջնորդ Գերշ. Տ. Սեպուհ Արք. Սարգիսեան, Լիբանանի Հայոց թեմի Առաջնորդ Գերշ. Տ. Գեղամ Արք. Խաչերեան, Հոգշ. Տ. Մեսրոպ վրդ. Սարգիսեան, կաթողիկոսարանի Երիտասարդական Բաժանմունքի Վարիչ, եւ Ազգ. Նարեկ վարժարանի հոգաբարձութեան ատենապետ տիար Վարդան Թաշճեան:
Համաժողովը տեղի պիտի ունենայ Կիպրոսի Փաֆոս քաղաքին մէջ: Պիտի մասնակցին Միջին Արեւելքի բոլոր եկեղեցիները: Համաժողովի գլխաւոր օրակարգի հարցերը պիտի ըլլան՝ անցնող չորս տարիներու ՄԱԵԽի գործունէութեան քննարկումը, նոր կառոյցի վաւերացումը, եւ նոր ընդհանուր քարտուղարի, նախագահի ու գորածադիր վարչութեան ընտրութիւնը:
Համաժողովէն յետոյ Վեհափառ հայրապետը պիտի նախագահէ Կիպրոսի թեմին կողմէ կազմակերպուած կարգ մը ձեռնարկներուն: Ան նաեւ պիտի ունենայ աշխատանքային հանդիպումներ թեմական մարմիններուն հետ:
Վեհափառ հայրապետը Անթիլիաս պիտի վերադառնայ Ուրբաթ, 2 Դեկտեմբերի երեկոյեան: