Սեպտեմբեր 29ին, Երեւանի մէջ, Չինաստանի հայ համայնքի («Չինահայ») նախագահ Հենրի Արսլանեան եւ Հայաստանի Ամերիկեան Համալսարանի (Հ.Ա.Հ.) նախագահ Արմէն Տէր-Կիւրեղեան փոխ-ըմբռնման յուշագիր մը ստորագրեցին, ըստ որուն՝ չինացի ուսանողներուն կը տրամադրուի կրթաթոշակ՝ Հ.Ա.Հ.ի մէջ ուսանելու համար: 2016էն սկսեալ, Չինաստանի հայ համայնքը կրթաթոշակ պիտի տրամադրէ այն չինացի ուսանողներուն, որոնք կը ցանկանան իրենց ուսումը շարունակել Հայաստանի մէջ: Կրթաթոշակը կը ներառէ թռիչքի, առողջութիւնն ապահովագրելու եւ Հայաստանի մէջ կեցութեան ապրուստի ծախսերը: Հ.Ա.Հ. իր հերթին եւս կը տրամադրի կրթաթոշակ, որ կը ծածկէ ուսման վարձը: «Չինահայ»ի եւ Հ.Ա.Հ.ի միացեալ ջանքերը կ՛օգնեն՝ չինացի ուսանողներու շրջանակին մէջ հետաքրքրութիւն առաջացնելու Հ.Ա.Հ.ի նկատմամբ, զայն յայտնի դարձնելու, ինչպէս նաեւ՝ նախադէպ հանդիսանալու Արեւելեան Ասիայէն եւս ուսանողներ Հայաստան հրաւիրելու ուղղութեամբ:
Հենրի Արսլանեան նշեց.- «Մենք հպարտութեամբ ենք առաջարկում այս կրթաթոշակը մեր չինացի ընկերներին: Սա նաեւ շնորհակալական քայլ կը լինի՝ ուղղուած մեր չինացի ընկերներին, ովքեր դարեր շարունակ ընդունում են հայերին: Մենք հաւատում ենք կրթութեան ուժին եւ յուսով ենք, որ այս կրթաթոշակը կը քաջալերի տաղանդաւոր չինացի ուսանողներին ուսումը շարունակելու Հայաստանում: Չինաստանի հայ համայնքի գաղափարական հիմնաքարերն են անկախութիւնը, թափանցիկութիւնը, կառավարումը: Մեր նպատակն է՝ դառնալ գերազանց հայկական կազմակերպութիւն, որը լաւ օրինակ կը հանդիսանայ ապագայ սերունդների համար: Մենք հպարտ ենք, որ համագործակցում ենք միեւնոյն գաղափարները կիսող Հ.Ա.Հ.ի հետ»:
Հ.Ա.Հ.ի մէջ ներկայիս կ’ուսանին տարբեր ազգերու ներկայացուցիչներ, որոնք իրենց հետազօտութիւնները կը կատարեն Հ.Ա.Հ.ի բազմաթիւ գիտական կեդրոններէն ներս: Արդէն երկար տարիներէ ի վեր Հ.Ա.Հ. կ’առաջարկէ 8 մագիստրոսական ծրագիր, իսկ 2013էն սկսեալ Հ.Ա.Հ.ի մէջ կարելի է ստանալ նաեւ Բակալաւրի կոչում: Բակալաւրիատը կը գործէ 2013էն, որու շնորհիւ 2012ի ուսանողական տարուան հետ բաղդատած՝ 2013ին արտասհմանէն դիմորդներու թիւը եռապատկուած է: