ՀՅԴ-ի 121-ամեայ անցած ուղին
Հ. Մ. «Արարատ» կազմակերպութեան «Կոմիտաս» սրահը մարդաշատ էր: Տօնուեցաւ 121-ամեայ կուսակցութեան յոբելեանը, որի հիմքում նախնիների թողած աւանդի շարունակականութիւնը, ժողովրդավարութիւնը, սոցիալիզմը եւ ինչպէս նշեց օրուայ բանախօս ՀՅԴ Հայաստանի Գերագոյն մարմնի ներկայացուցիչ Արմէն Ռուստամեանը, գործն ու հաւատքն է։
Ա. Ռուստամեանի համոզմամբ՝ Դաշնակցութիւնը յատկապէս գործի է լծւում այն ժամանակ, երբ ժողովուրդը յուսալքուած է ու թեւաթափ եւ զօրավիգ լինելով նրան՝ իր դարաւոր փորձով ու գործով ներշնչում է հաւատք: Ահա հիմնասիւն հանդիսացող այն գաղափարներից մէկը, որով արդէն աւելի քան մէկ դար է ժողովրդի թիկունքում վերընձիւղուած՝ զօրեղ կանթեղի նման՝ բոցավառւում է ՀՅԴ-ի գաղափարախօսութեան անշէջ հուրը՝ եթէ Սփիւռքում որպէս ազգապահպանման կարեւոր լծակ, ապա Հայաստանում ժողովրդի խնդիրներով ու հոգսերով մտահոգ՝ ժողովրդի կողքին ընդդիմացող կուսակցութիւն:
«Մշակ բանուոր» քայլերգով սկիզբ առաւ միջոցառումը, ապա պաստառին ցուցադրուեցին անցեալ տարի Թեհրանում կայացած ՀՅԴ-ի 120-ամեակին նուիրուած միջոցառումներից հատուածներ: Փոքրիկ երաժշտական ընդմիջում՝ Էդւին Սուլթանեանի կատարմամբ երգ էր՝ նուիրուած ՀՅԴ-ի 121-ամեակին:
Օրուայ միջոցառման բացման խօսքով հանդէս եկաւ «ՀՈՒՍԿ» հաստատութեան վարչութեան նախագահ Սուրիկ Աբնուսեանը, որն իր խօսքում յատկանշական կերպով սեպեց կարեւոր մի գաղափար, այն էր՝ Դաշնակցութիւնը գործից ծնուեց, ձեւաւորուեց գործի մէջ եւ եղաւ ու մնաց գերազանցաբար գործի կուսակցութիւն:
Աւարտելով խօսքը՝ պրն. Աբնուսեանը բեմ հրաւիրեց օրուայ բանախօս ՀՅԴ Հայաստանի Գերագոյն մարմնի ներկայացուցիչ Արմէն Ռուստամեանին: Պրն. Ռուստամեանը իր խօսքի նախաբանում անդրադառնալով կուսակցութեան գաղափարախօսութեանը, նրա ձեւաւորած դրոյթներին, կուսակցութեան հիմնադիրների աւանդ թողած ժառանգութեանը, որոնց հէնքի վրայ էլ իր ժողովրդավարութեամբ ապրեց ու գոյատեւեց ՀՅԴ-ն՝ ամրագրուելով որպէս աւանդական կուսակցութիւն՝ խօսեց Հայաստանում այսօր որպէս ընդդիմութիւն դարձած քաղաքական ճշտած այն ուղեգծերից, որով համապետական նշանակութեամբ ընտրութիւնների նախաշեմին կը ներկայանայ ՀՅԴ-ն եւ ուսումնասիրուած դրոյթներով կը մասնակցի դրանց: Քաղաքական ճշդուած ուղեգծեր, որոնք ուղղուած են Հայաստանում ձեւաւորուած օլիգարխիկ երեւոյթների դէմ պայքարին, հիմքային նախագահական ընտրութիւնների համակարգի փոփոխմանը, քանզի նրա կարծիքով՝ սխալ է, երբ մէկ անհատ է որոշում ժողովրդի ճակատագիրը:
Բանախօսի ելոյթին յաջորդեց «ՀՈՒՍԿ» հաստատութեան նախաձեռնութեամբ «Հայեացք դէպի ապագայ» վաւերագրական տեսաֆիլմի ցուցադրութիւնը, որի հեղինակն էր Անահիտ Աբադը:
Բեմ հրաւիրուեց Թեհրանի հայոց թեմի առաջնորդ Տ. Սեպուհ արք. Սարգսեանը, որը շնորհաւորելով ՀՅԴ-ի 121-ամեակը՝ անդրադարձաւ ՀՅԴ-ի պատմութեան մի քանի անցքերին, որոնք պատմական նշանակութեամբ առանցքային դրուագներ էին՝ խօսքն ուղղելով երիտասարդներին, որ երբեւէ չպէտք է մոռանան պատմութիւնը եւ լինեն արժանաւոր կրողն ու ժառանգորդը իրենց ազգի պատմութեան:
Գեղարուեստական ծրագրում ազգային երգերի կատարմամբ ելոյթ ունեցան՝ Ռայիսա Աւանէսեանը եւ Էդւին Սուլթանեանը. վերջինիս նուագակցում էին՝ Ռոնի Բաբախանեանը եւ Վահագն Սարգսեանը. կատարումներ, որոնք ամբողջացրին միջոցառումը՝ որպէս ազգային յոբելեան եւ յոբելեար, որը դեռ երկար կը քայլի դարերի յորձանուտներով, բացելով կանաչ արահետներ՝ ի բարօրութիւն իր ժողովրդի։