Նոյեմբեր 7-ին Մոսկուայի տան ցուցասրահին մէջ  տեղի ունեցաւ արտաքին գործոց նախարարութեան դիւանագիտական դպրոցի տնօրէն դեսպան Վահէ Գաբրիէլեանի ARTSAKH: the people and land of KARABAKH («Արցախ՝ Ղարաբաղի ժողովուրդն ու հողը») անգլերէն գրքի շնորհանդէսը եւ գիրքին մէջ ներկայացուած հեղինակային լուսանըկարներու  ընտրանիի մը  ցուցահանդէսի բացումը:

Շնորհանդէսին ներկայ էին ՀՀ ԱԺ բարձրաստիճան ղեկավարներ, ՀՀ կառավարութեան անդամներ, Հայաստանի մօտ  հաւատարմագրուած դեսպաններ, սփիւռքահայ հիւրեր, արուեստասէրներ, միջազգային կառոյցներու, հասարակական կազմակերպութիւններու եւ լրատուամիջոցներու  ներկայացուցիչներ:
Իր խօսքին մէջ  ՀՀ արտաքին գործերու  նախարար Էդվարդ Նալբանդեանը կարեւորեց թէ՛  գիրքի գեղարուեստական արժանիքները, թէ՛  ՀՀ արտաքին քաղաքականութեան կարեւորագոյն խնդրի՝  ԼՂ հիմնահարցի մասին իրազեկութեան բարձրացման գործին մէջ  գիրքէն  ակնկալուող ներդրումը: Նախարար Նալբանդեանի խօսքով գիրքը նաեւ Արցախ այցելելու իւրատեսակ հրաւէր է:
Դեսպան Վահէ Գաբրիէլեանը նշեց, որ գիրքը ստեղծուած  է Հայաստանի եւ մասնաւորապէս Արցախի մասին օտար լեզուով  ներկայանալի գրականութեան պակասի գիտակցումով  եւ  հիմնական նպատակն է  Արցախի հրաշագեղ բնութեան, ճարտարապետական գլուխգործոցներու  եւ յուշարձաններու  պատշաճ ներկայացման միջոցով երկրի վրայ ուշադրութիւն հրաւիրելն, եւ այդ բնագաւառէն ներս  տեղեկատուական բացը  լրացնել:
Գիրքին մէջ  եօթ հարիւրէ  աւելի հեղինակային լուսանկարներով ներկայացուած են Արցախի ամրոցները, միջնադարեան կամուրջները, վանքերն ու եկեղեցիները, քաղաքներն ու գիւղերը, մելիքական ապարանքները, յուշահամալիրները, թանգարանները եւ դրոշմանիշները. անդրադարձ  կատարուած է միջնադարեան մանրանկարչութեան  եւ գորգարուեստին: Լուսանկարներուն մօտ  ներառնուած են  համառոտ բացատրութիւններ: Արցախի բնութեան համայնապատկերները եւ ճարտարապետական գլուխգործոցներու  նմուշները լուսանկարուած են տարուայ տարբեր եղանակներուն։
Պատմական եւ ժամանակակից քարտէսներով փաստարկած  մասով տրուած է նաեւ  Արցախի վերաբերեալ պատմական ակնարկ՝ հնագոյն ժամանակներէն մինչեւ  մեր օրերը:
Ցուցահանդէսը, որը 2009ին «Բրիտանիա» ցուցահանդէսէն  յետոյ Վահէ Գաբրիէլեանի լուսանկարներու  երկրորդ անհատական ցուցադրումն է, պիտի գործէ մէկ շաբաթ: Կը նախատեսուի այն ցուցադրել նաեւ Արցախի մէջ։