ԹԱՍՍ լրատու գործակալութիւնը կը հաղորդէ, որ Միացեալ Նահանգներ, ահաբեկչութեան մէջ կասկածուող անձերու դէմ ամերիկեան գաղտնի սպասարկութիւններուն կողմէ իրականացուող բռնութիւններու մասին զեկուցումի հրապարակման նախօրեակին, ուժեղացուցած են իրենց դեսպանատուներուն եւ հիւպատոսարաններուն անվտանգութիւնը:
Ուաշինկթըն կը զգուշանայ, որ այդ փաստաթուղթը որոշ երկիրներու մէջ, ինչպէս օրինակ՝ արաբական արեւելքին մէջ, զայրոյթի պատճառ պիտի դառնայ եւ պիտի յանգեցնէ ամերիկեան դիւանագիտական ներկայացուցչութիւններու դէմ յարձակումներու: «Հաւանական է, որ զեկուցումին հրապարակումը ամբողջ աշխարհի մէջ աւելցնէ ամերիկեան բոլոր հաստատութիւններուն եւ Միացեալ Նահանգներու քաղաքացիներուն ուղղուած ամբողջ վտանգը», յայտարարած է Սպիտակ տան մամլոյ բանբեր Ճոշ Էռնեսթ:
Ան նշած է, որ Միացեալ Նահանգներ միջոցառումներու պիտի ձեռնարկեն անվտանգութիւնը ապահովելու համար: