Պոլիվիոյ խորհրդարանը միաձայնութեամբ ընդունած է Հայոց ցեղասպանութիւնը ճանչցող, յանցագործութիւնը դատապարտող եւ հայ ժողովուրդին զօրակցութիւն յայտնող բանաձեւ մը:
Ծերակոյտի նախագահ Սոնիա Կուարտիա Մելկար «Փրենսա Արմենիա» հայկական լրատուամիջոցին ըսած
է, որ միաձայնութեամբ հրապարակուած բանաձեւը ընդունուած է ինչպէս Ներկայացուցիչներու տան, նոյնպէս ալ Ծերակոյտին կողմէ` նախապէս արժանանալով արտաքին գործոց նախարարութեան համաձայնութեան: «Մենք մեր անվերապահ աջակցութիւնն ու զօրակցութիւնը կը յայտնենք հայ եւ քիւրտ ժողովուրդներուն, որովհետեւ մեր պետական սահմանադրութիւնը` օրէնքներուն օրէնքը կը մերժէ խտրականութիւնը, մարդու իրաւունքներու խախտումը եւ ցեղասպանութիւնները»:
Ան աւելցուցած է, որ իրենք նկատի ունին 1915-1923 թուականներուն հայերուն դէմ թրքական պետութեան գործած յանցանքը: Բանաձեւին ամբողջական յօդուածը հետեւեալն է`«Պոլիվիոյ Օրէնսդիր ժողովը կը կիսէ եւ կը զօրակցի հայ ժողովուրդի պահանջատիրական պայքարին` յանուն մարդու իրաւունքներու պաշտպանութեան, ճշմարտութեան եւ արդարութեան հաստատման: Ան կը յայտարարէ իր զօրեղ յանձնառութիւնը մարդու իրաւունքներու ու արդարութեան պաշտպանութեան ուղղութեամբ եւ կը դատապարտէ հայ ժողովուրդին դէմ գործադրուած ցեղասպանութեան ու կրած տառապանքներուն ժխտման քաղաքանութիւնը»:
Յիշեցնենք, որ լատինամերիկեան այս երկրէն զատ այդ ցամաքամասին մէջ ցեղասպանութիւնը պաշտօնապէս դատապարտած են նաեւ Ուրուկուէյը եւ Արժանթինը: Ուրուկուէյը եղած է առաջին պետութիւնը, որ նման փաստաթուղթ ընդունած է:
Հայաստանը երախտապարտ է Պոլիվիային
ՀՀ արտաքին գործոց նախարար Էդուարդ Նալբանդեանը յայտարարութիւն տարածած է Պոլիվիայի կողմէ Հայոց Ցեղասպանութեան ճանաչման կապակցութեամբ, յայտնելով թէ «Մեր երախտագիտութիւնը կը յայտնենք Պոլիվիայի խորհրդարանի զոյգ պալատներուն, երկրի ղեկավարութեան եւ բարեկամ ժողովուրդին՝ Օսմանեան կայսրութեան մէջ իրականացած Հայոց Ցեղասպանութեան ճանաչման համար: Այս քայլով՝ Հայոց Ցեղասպանութեան 100րդ տարելիցին ընդառաջ՝ Պոլիվիան իր կարեւոր ներդրումը բերաւ պատմական արդարութեան վերականգնման, մարդկութեան դէմ յանցագործութիւններու ճանաչման, դատապարտման, կանխարգիլման եւ ժխտողականութեան դէմ պայքարի վեհ գործին»: