Անցած Շաբաթ օր Փարիզի Սուրբ Յովհաննէս Մկրտիչ առաջնորդանիստ եկեղեցու սրահին մէջ գումարուած Ֆրանսայի Հայոց թեմի Թեմական պատգամաւորական ժողովին կատարուեցաւ նոր թեմակալ առաջնորդի ընտրութիւնը:

Առաջադրուած թեկնածուներու եռանուն ցանկէն 54 թեմական պատգամաւորներէն ներկայ 44-ը քուէներու մեծամասնութեամբ Ֆրանսայի Հայոց թեմի առաջնորդ ընտրեցին Մայր Աթոռ Սուրբ Էջմիածնի միաբան, Մեծն Բրիտանիայի Հայոց թեմի առաջնորդ Վահան եպս. Յովհաննիսեանը:
Գարեգին երկրորդ Ամենայն Հայոց կաթողիկոսի կողմէ ընտրութեան արդիւնքներու հաստատումէն յետոյ Վահան եպիսկոպոսը պիտի ստանձնէ Ֆրանսայի Հայոց թեմի առաջնորդի պաշտօնը:
Վահան եպիսկոպոս Յովհաննիսեան 51 տարեկան է. ծնած է Պաղտատ: Աշխատութիւններու եւ յօդուածներու հեղինակ է: