ՀՅԴ Բիւրոյի Հայ Դատի կեդրոնական խորհուրդի գրասենեակէն ստացած ենք հետեւեալ հաղորդագրութիւնը.
Երեւանում, Մարտի 30, 31ին եւ Ապրիլի 1ին գումարուեց ՀՅԴ Հայ Դատի յանձնախմբերի եւ գրասենեակների խորհրդաժողովը: Ապրիլի 2ին գումարուեց ՀՅԴ Բիւրոյի Հայ Դատի կենտրոնական խորհըրդի նիստը:
Խորհրդաժողովին մասնակցեցին մօտ 60 ներկայացուցիչներ՝ Հայ Դատի 25 յանձնախմբերից եւ գրասենեակներից, ՀՅԴ կուսակցական մարմիններից. ներկայ էին նաեւ մի շարք հրաւիրեալներ:
Խորհրդաժողովի օրակարգի հիմնական կէտերը
Աշխատանքներ Հայոց Ցեղասպանութեան միջազգային ճանաչման եւ պահանջատիրական պայքարի ուղղութեամբ.
Հայ-թուրքական յարաբերութիւններ.
Արցախի իրաւական միջազգային ճանաչման եւ բանակցային գործընթացի հիմնախնդիր.
Ադրբեջանի հակահայ քաղաքականութեան դէմ պայքար.
ՀՀ արտաքին քաղաքականութիւն եւ մարտահրաւէրներ.
Ջաւախքի հայութեան իրաւունքների պաշտպանութեան ուղղութեամբ նախաձեռնութիւններ:
Խորհրդաժողովը քննարկց Հայ Դատի աշխատանքների ընթացքը Հայ Դատի նախորդ՝ 2010թ. խորհըրդաժողովից առ այսօր եւ ՀՅԴ Հայ Դատի ռազմավարութեան հիման վրայ՝ ուրուագծեց առաջիկայ երկամեակի աշխատանքային ծրագրերը:
Խորհրդաժողովը արձանագրեց այն փաստը, որ մեծաւ մասամբ Հայ Դատի յանձնախմբերի աշխատանքի շնորհիւ Հայոց Ցեղասպանութեան միջազգային ճանաչման եւ յանուն Հայաստանի ու հայութեան իրաւունքների պահանջատիրութեան պայքարը մտել է նոր հանգրուան, երբ մի կողմից Հայոց Ցեղասպանութիւնը ճանաչած եւրոպական երկրներում այդ փաստի ժխտումի քրէականացման ուղղութեամբ առկայ է դրական տեղաշարժ, իսկ միւս կողմից՝ հայութեան իրաւունքների խնդիրը արդէն սկսել է արծարծուել քաղաքական ատեաններում, յատկապէս՝ Ամերիկայի Միացեալ Նահանգների Կոնգրեսում: Խորհրդաժողովը շեշտեց, որ անհրաժեշտ է այս ուղղութեամբ շարունակել եւ իր աւարտին հասցնել Հայաստանի եւ հայութեան իրաւունքների ամբողջական փաթեթի մասնագիտական պատրաստութեան գործը եւ այդ իրաւունքների արծարծումը ամէնուրեք՝ ներազգային եւ արտաքին ճակատների վրայ դարձնել Հայոց Ցեղասպանութեան 100ամեակի առիթով միջոցառումների առանցքը: Խորհրդաժողովը որոշեց աշխատանք տանել յանուն նրա, որ համայն հայութիւնը 100ամեակը դիմաւորի իր իրաւունքների շուրջ միասնական կեցուածք որդեգրած:
Հայ-թուրքական յարաբերութիւնների գծով խորհրդաժողովը արձանագրեց այն փաստը, որ 2009թ. Հոկտեմբերի 10ին ստորագրուած Հայաստան-Թուրքիա արձանագրութիւնները շարունակում են վտանգ ներկայացնել Հայաստանի ու հայութեան շահերին, հետեւաբար կենսական է նրանց իրաւական ականազերծումը՝ Հայաստանի ստորագրութիւնը յետ վերցնելով: Այս ամբողջ գործընթացում Թուրքիան ցոյց տուեց, որ պատրաստ չէ Հայաստանի հետ առանց նախապայմանների դիւանագիտական յարաբերութիւններ հաստատելու եւ հակաօրինական շրջափակումը վերացնելու: Հայ Դատի յանձնախմբերը անընդհատ միջազգային հանրութեանը կը յիշեցնեն այս փաստը եւս:
Խորհրդաժողովը կարեւորեց Արցախի հանրապետութեան տարբեր ձեւերով եւ մակարդակներով ճանաչում ապահովելու նպատակով աշխատանքները եւ որոշեց բազմակողմանի նախաձեռնութիւններ առնել տարբեր երկրներում եւ միջազգային կառոյցներում: Խորհրդաժողովը կարեւորեց նաեւ որպէս հակամարտութեան լիիրաւ կողմ՝ Լեռնային Ղարաբաղի Հանրապետութեան ուղղակի մասնակցութիւնը կարգաւորման բանակցութիւններին:
Խորհրդաժողովը բազմակողմանիօրէն քննարկեց Ադրբեջանի եւ Թուրքիայի կողմից հակահայ քաղաքականութեան եւ քարոզչութեան դէմն առնելու փորձը: Արձանագրուեց, որ տարբեր երկրներում բնակուող ադրբեջանական եւ թուրքական համայնքները դարձել են Ադրբեջանի եւ Թուրքիայի պետութիւնների ամբողջական կամակատարը եւ փորձում են այդ երկրներում տիրող հայութեան եւ Հայաստանի նկատմամբ պատմական կեղծիքն ու պետական ատելութիւնը «արտահանել» այլ երկրներ եւս: Խորհրաժողովը այս հակահայ քաղաքականութիւնը ձախողեցնելու նպատակով կայացրեց մի շարք որոշումներ եւ շեշտեց Հայաստանի եւ Արցախի Հանրապետութիւնների կողմից աշխատանքի իրենց բաժինը ստանձնելու եւ կամ աշխուժացնելու կարեւորութիւնը:
Հայաստանի Հանրապետութեան արտաքին քաղաքականութեան եւ մարտահրաւէրների շուրջ խորհրդաժողովի մասնակիցները արտայայտեցին մի շարք մտահոգութիւններ եւ դրանք յաղթահարելու իրենց պատկերացումները: Խորհրդաժողովը վերահաստատեց արտաքին ճակատի վրայ հայկական պետականութեան հզօրացմանը սատարելու Հայ Դատի յանձնախմբերի պատրաստակամութիւնը:
Խորհրդաժողովը կարեւորեց Հայաստանի շահերի, ինչպէս նաեւ հայ-վրացական յարաբերութիւնների սերտացման տեսանկիւնից եւս Ջաւախքի հայութեան քաղաքական, կրթական-մշակութային եւ հոգեւոր իրաւունքների պաշտպանութեան եւ սոցիալ-տնտեսական վիճակի բարելաւման անհրաժեշտութիւնը եւ այդ ուղղութեամբ առաւ գործնական մի շարք որոշումներ:
Խորհրդաժողովը առանձին զեկոյցով քննարկեց նաեւ «Մերձաւոր Արեւելքի վերջին զարգացումները, Թուրքիայի դերակատարութիւնը եւ Հայ Դատի աշխատանքների նոր մարտահրաւէրները» հարցը: Ինչպէս նաեւ քննարկեց Հայ Դատի յանձնախմբերի եւ գրասենեակների աշխատանքների արդիւնաւէտութեան բարձրացմանն ուղղուած գործնական խնդիրներ:
ՀՅԴ Բիւրոյի Հայ Դատի կենտրոնական խորհուրդը Ապրիլի 2ի իր նիստում ամփոփեց խորհրդաժողովի արդիւնքները եւ խորհրդաժողովի եզրակացութիւնների գործադրման ուղղութեամբ կարգադրութիւններ արեց: Խորհուրդը որոշեց Հայ Դատի յանձնախմբերի եւ գրասենեակների յաջորդ խորհրդաժողովը գումարել 2014թ.ին, իսկ Հայ Դատի տարածաշրջանային խորհրդաժողովները՝ 2013թ.ին: