Մայիս 12-ին Գերմանիոյ Ռայնլանտ Փֆալց դաշնային հողի խորհրդարանը Հայոց ցեղասպանութեան 100-ամեակի առիթով ցեղասպանութիւնը դատապարտող համատեղ բանաձեւ մը ներկայացուցած է:
Մայրաքաղաք Մայնցի խորհըրդարանի բոլոր խմբակցութիւնները Օսմանեան կայսրութեան մէջ 1915-ի կատարուածը բնութագրելու համար օգտագործած են ցեղասպանութիւն եզրը: Բանաձեւին մէջ մասնաւորապէս կ՛ըսուի. «Գերմանիոյ նախագահ Եոախիմ Կաուկ, Պունտեսթակի նախագահ Նորպերթ Լամերթ ու Պունտեսթակի բոլոր խմբակցութիւններու ներկայացուցիչները իրենց ելոյթին մէջ յուզիչ բառերով յստակ նշեցին այս տարելիցի նշանակութիւնը: Մենք բոլորս պէտք է կրենք այս Ցեղասպանութեան պատմական պատասխանատուութիւնը, յատկապէս գերմանական ռէյխի ունեցած դերի պարունակին մէջ: Այդ պատճառով մենք կը ներկայացնենք այս համատեղ բանաձեւը: Խօսքը ոչ միայն զոհերը յիշելու, այլ առաջ նայելու անհրաժեշտութեան մասին է: Մեր համատեղ նպատակն է հասնիլ հաշտութեան, փոխըմբռնման եւ ճանաչման: Այդ պատճառով մենք կողմ ենք հայ-թրքական յարաբերութիւններու զարգացման: «Բանաձեւը կոչ կ՛ուղղէ յիշելու 100 տարի առաջ տեղի ունեցած Հայոց ցեղասպանութեան մասին: Խորհրդարանի խմբակցութիւնները կը դատապարտեն Օսմանեան կայսրութեան արարքը, որ յանգեցուց 1.5 միլիոն հայերու բնաջնջման: Խմբակցութիւնները կը ցաւին ատոր մէջ Գերմանական ռէյխի ունեցած անփառունակ դերակատարման համար, որ, հակառակ սպանութիւններու եւ տեղահանութիւններու մասին ունեցած յստակ տեղեկութիւններուն, չփորձեց վերջ դնել մարդկութեան դէմ իրականացուած այդ յանցագործութեան: «Խորհրդարանական ուժերը հաւատարիմ կը մնան հայ-թրքական հաշտեցման իրենց որոշումին: Այդ իսկ պատճառով մենք կոչ կ՛ուղղենք Ռայնլանտ Փֆալցի դաշնային կառավարութեան խրախուսելու 1915-1916 թուականներու դէպքերուն առերեսման ուղղուած բոլոր ջանքերն ու նախաձեռնութիւնները եւ հետեւողական ըլլալու Գերմանիոյ պատասխանատուութեան բաժինը ընդունելու հարցով»,- բանաձեւին բնագիրը կը մեջբերէ RheinZeitung-ը: