Քալիֆորնիոյ Ծերակոյտը Ճանչցաւ Արցախի Անկախութիւնը

Ծերակոյտը որոշեց նաեւ իր բանաձեւը յղել ԱՄՆ Քոնկրեսին եւ նախագահին

ՍԱՔՐԱՄԵՆԹՕ.- «Ասպարէզ» կը հաղորդէ թէ Քալիֆորնիոյ նահանգային Ծերակոյտը երէկ Չորեքշաբթի, Օգոստոս 27ին, հետեւելով նահանգային խորհրդարանի օրինակին՝ պատմակշիռ քայլ մը առաւ Արցախի անկախութեան միջազգային ճանաչման ուղղութեամբ՝ վաւերացնելով Լեռնային Ղարաբաղի Հանրապետութեան անկախութիւնը եւ Արցախի ժողովուրդի ինքնորոշման իրաւունքը ճանչցող AJR-32 բանաձեւը:

Քալիֆորնիոյ Ծերակոյտը նաեւ որոշեց իր բանաձեւը յղել Ամերիկայի Միացեալ Նահանգներու Քոնկրեսին եւ նախագահին՝ դիմելով անոնց, որպէսզի անոնք եւս, իրենց կարգին նպաստեն Արցախի ժողովուրդի ինքնորոշման իրաւունքի ճանաչման եւ անոր ժողովրդավարական իղձերու իրականացման ջանքերուն։
Յիշեցնենք, որ Քալիֆորնիոյ նահանգային խորհրդարանը Մայիս 8ին վաւերացուցած էր նման բանաձեւ մը։