ՀՅԴ անդամ, խմբակցութեան նախկին պատգամաւոր Հրայր Կարապետեան նշանակուել է Սանկտ Պետերբուրգում գլխաւոր հիւպատոս: Հրամանը ուժի մէջ կը մտնի Նոյեմբերի 15-ից: ՀՅԴ-ական պատգամաւոր Վահան Յովհաննիսեանն էլ, ինչպէս յայտնի է, նշանակուելու է Գերմանիայում ՀՀ դեսպան:

Որոշ ընդդիմադիր պատգամաւորներ եւ քաղաքագէտներ գտնում են, որ սա համագործակցութիւն է իշխանութեան հետ:

Այս հարցերի շուրջ Henaran.am-ը զրուցեց ԱԺ ՀՅԴ խմբակցութեան քարտուղար Աղուան Վարդանեանի հետ:

Պարոն Վարդանեան, տպաւորութիւն է ստեղծւում, որ արտաքին քաղաքականութիւնը փորձում էք ձեր ձեռքը վերցնել, այդպէ՞ս է: 

Ոչ, այդպէս չէ: 

Իսկ ինչպէ՞ս կը մեկնաբանէք ընդդիմադիր գործիչի նշանակումը գլխաւոր հիւպատոս:

Հրայր Կարապետեան որեւէ քաղաքական պաշտօն չի զբաղեցնում այս պահին կուսակցութիւնում, ինքն ունի փորձառութիւն, տարիներ շարունակ եղել է ԱԺ յանձնաժողովի նախագահ, փոխ նախագահ եւ պետութիւնը նպատակայարմար է գտել իր փորձառութիւնն, իր կարողութիւնը օգտագործել իբրեւ հիւպատոս: Սա որեւէ նոր բան չի աւելացնում կամ փոխում մեր քաղաքականութեան մէջ: 

Որոշ պատգամաւորներ գտնում են, որ դա համագործակցութիւն է իշխանութիւնների հետ, կա՞յ նման բան:

Մենք միշտ ասել ենք, որ արտաքին քաղաքականութեան ոլորտում նոյնիսկ Դաշնակցութեան կասեցման տարիներին, եթէ կան խնդիրներ, որ առնչւում են մեր պետութեան անվտանգութեան, արտաքին քաղաքականութեան, ապա մենք համագոծակցել ենք եւ Լեւոն Տէր-Պետրոսեան, եւ Ռոպերթ Քոչարեանի, եւ այսօրուայ իշխանութեան հետ: Բնականաբար, միշտ կը լինեն մարդիկ, հազարաւոր մարդիկ, տասնեակ հազարաւոր մարդիկ, ովքեր մեր քաղաքականութիւնը չեն ընդունի ու պիտակներ կուտան: Բայց մենք անում ենք այն, ինչ ճիշդ ենք գտնում ու համաձայն ենք, որ մարդիկ կþունենան տարբեր տեսակէտներ: Դա ողբերգութիւն չէ, մանաւանդ այդ մարդիկ, որ այդ դիրքերից խօսում են, երբեք էլ Դաշնակցութեան կողքը կանգնած չեն եղել, Դաշնակցութեան չեն քուէարկել, նորմալ է: 

Որպէս ընդդիմադիր ուժ, ձեր վարկանիշի վրայ այս նախադէպերը չեն կարո՞ղ ազդել:

Ոչ, չեն կարող ազդել: Ո՞ր վարկանիշի մասին է խօսքը, մենք բազմիցս խօսել ենք՝ Հայաստանում վարկանիշները որոշւում են ընտրութիւններով: Մենք գիտենք եւ գնահատականները տուել ենք բազմիցս Հայաստանում ընտրութիւնների վերաբերեալ. այս կարգի ընտրութիւններով որեւէ իրական վարկանիշ բնականաբար հնարաւոր չէ կանխատեսել:

Ընդդիմադիրի կեցուածքին, փաստօրէն, բացարձակապէս չի հարուածո՞ւմ:

Բացարձակապէս չի հարուածում: Ընդդիմութիւնը յաճախ սխալ են պատկերացնում, մենք վստահ ենք՝ այսօր մենք ենք ամենահիմնաւորւած ու փաստարկուած պառլամենտական ընդդիմութիւնը մեր գործունէութեամբ, եւ աչք ունեցողը կը տեսնի, ականջ ունեցողը կը լսի, աչք ունեցողը չի տեսնի, ականջ ունեցողը չի լսի:

Վահան Յովհաննիսեանի դէպքում այդ հարցը քննարկել էիք կուսակցութիւնում, այս դէպքո՞ւմ էլ էք քննարկել: 

Յատուկ քննարկում չենք արել, Հրայրի հետ կապուած այդ խօսակցութիւնները վաղուց կային, երբ որ արդէն ԱԺ պատգամաւոր չէր: Յատուկ քննարկելը հարկ էլ չենք համարում, որովհետեւ անհատ է ինքը, եւ բնականաբար, իրեն արուած առաջարկի ընտրութիւնն ինքն է կատարել:

Մի մոռացէք, որ այս ամբողջ ընթացքում Սանկտ-Պետերբուրգի գլխաւոր հիւպատոսը դարձեալ Դաշնակցութիւնից էր , բայց ոչ մէկդ այդ մասին չէիք խօսում, մարդն անում էր իր փրոֆեսիոնալ մասնագիտական աշխատանքը, հիմա կը վերադառնայ, վստահ եմ, որ ԱԳՆ-ը կը շարունակի իր դիւանագիտական որոշակի առաքելութիւնն իրականացնել, նորմալ երեւոյթ է:

«Յենարան»