Այս օրերին Հայաստանում քաղաքական կեանքը, կարելի է ասել, մեռած վիճակում է: Մինչդեռ սոցիալական դժգոհութիւնը գնալով հասունանում է, եւ առաջիկայում սպասուելիք թանկացումներից առաջ հնարաւոր է, որ այն պայթի՝ սոցիալական բունտի տեսքով:

Այս իրավիճակում յատկապէս տարօրինակ է իրենց ընդդիմադիր հռչակած քաղաքական ուժերի պահուածքը: Որտե՞ղ են նրանք, ինչո՞վ են զբաղուած եւ ի՞նչ են պատրաստւում անել:

Այս հարցերի շուրջ «Ժողովուրդ»ը զրուցեց ԱԺ ՀՅԴ խմբակցութեան անդամ Արծուիկ Մինասեանի հետ:

Պարո՛ն Մինասեան, սոցիալական այս աննախադէպ լարուածութեան շրջանում ընդդիմադիր համարւող «Հայ Յեղափոխական դաշնակցութիւն»ը շատ պասիւ է ու քաղաքական դաշտում որեւէ գործունէութիւն չի ծաւալում: Մինչդեռ հասարակութիւնը ձեր կարիքը շատ պէտք ունի: Ինչո՞վ է ընդհանրապէս զբաղուած ՀՅԴ-ն: 

Հայ Յեղափոխական Դաշնակցութիւնը, ինչպէս միշտ, գործում է Հայաստանում ու իր ծրագրերն իրականացնում թէ՛ կուսակցական, թէ՛ հանրային նշանակութեան հարցերի փուլում աշխատանքներ կատարելու միջոցով: Բնականաբար, թէեւ արձակուրդային շրջան է, բայց մենք աշխատում ենք Հայաստանի առջեւ ներկայ փուլում             ծառացած խոշորագոյն մարտահրաւէր համարուող արտագաղթի կասեցման ծրագրի վրայ եւ յուսով ենք, որ ակտիւութեան շրջանին համապատասխան՝ մենք մեր այս առաջարկութիւնները կը ներկայացնենք, կը հրապարակենք եւ հանրութեանը կը փորձենք համախմբել այդ ծրագրերի շուրջ: Իսկ երկրորդ կարեւոր հարցը, որն այժմ քննարկում ենք, վերաբերում է տրանսպորտի ռազմավարութեանը: Դրա հետ կապուած՝ կան առաջարկներ, որոնց շուրջ մենք նոյնպէս աշխատանքներ ենք տանում:

Ընդդիմութիւն համարուող «Ժառանգութիւն» կուսակցութիւնը մօտաւորապէս 20 օրուայ համար Ազատութեան հրապարակը բրոնեայ է արել՝ հանրահաւաքներ անցկացնելու նպատակով: Չէ՞ք կարծում, որ եթէ «Ժառանգութիւն»ը ակտիւանայ, ձեր կուսակցութիւնն իր առաջարկներով կը յայտնուի լուսանցքից դուրս: 

Չեմ կարծում, քանի որ ամէն մէկն իր ռազմավարութիւնը, իր տակտիկան ունի, մենք էլ ենք աշխատում, յաջողութիւն եմ մաղթում բոլոր քաղաքական ուժերին, ովքեր որ կը փորձեն ակտիւ լինել այս ընթացքում: Բայց նշեմ, որ «Դաշնակցութիւն»ը միշտ էլ ակտիւ է եղել ու շարունակում է լինել: Իհարկէ, չգիտեմ, թե ձեր նշած ակտիւութիւնն ասելով՝ ինչ նկատի ունեք, եթէ հրապարակային լինելն է ակտիւութեան չափորոշիչը, ապա մենք դա պլանաւորում ենք առաւել ակտիւ ժամանակահատւածում իրականացնել: Ու նաեւ հասարակութեան համախմբման միջոցն ապահովել:

ՀՅԴ Բիւրոյի ներկայացուցիչ Հրանտ Մարգարեանը յայտարարել էր, թէ ձեր կողմից քննադատւելուց յետոյ ՀՀ վարչապետ Տիգրան Սարգսեանը պատերազմ է յայտարարել Դաշնակցութեանը՝ փորձելով քանդել կուսակցութիւնը: Չէ՞ք կարծում, որ ՀՅԴ-ն իր պասիւ գործունէութեամբ նպաստում է այդ պրոցեսին: 

Տերմինաբանութիւնը, որն օգտագործում էք, բացարձակ ինձ համար ընդունելի չէ քանդել, աւիրել, չգիտեմ ինչ: Երկրորդն էլ՝ այն, ինչ ասել է ՀՅԴ Բիւրոյի ներկայացուցիչը, արդէն ասել է, ես աւելացնելու բան չունեմ: Իսկ ինչ վերաբերում է կուսակցութեան ակտիւ գործունէութեանը, ես արդէն նշեցի, որ կուսակցութիւնն իր ակտիւութիւնը ցուցաբերել է, եւ որեւէ մէկը չէ, որ պէտք է կողքից փորձի, չգիտեմ, գնահատական հնչեցնել կուսակցութեան մէջ տեղի ունեցող գործընթացների մասին: Դաշնակցութիւնն այն միաւորն է, որն ունի կամք, ունի վճռականութիւն՝ իր խնդիրներն ինքնուրոյն քննարկելու եւ լուծելու համար:

Իսկ Հայ ազգային կոնգրէս կուսակցութիւնը քաղաքական նոր պլատֆորմով է ցանկանում հանդէս գալ՝ աշնանը քաղաքական նոր ալիք բարձրացնելու նպատակով… 

Ես նման ինֆորմացիայից տեղեակ չեմ, ճիշդ կը լինի, որ այդ հարցին պատասխանի Հայ ազգային կոնգրէս-ը: Մի բան ես յստակ կարող եմ ասել, որ հասարակութիւնում իսկապէս անհրաժեշտ է համախմբում, այն, ինչ մենք անընդհատ փորձում ենք անել, փորձում են անել տարբեր քաղաքական միաւորումներ: Արդէն համազգային համախմբման ժամանակն է: Ժամանակն է խօսքից գործին անցնելու: Իսկապէս երկրի առջեւ ծառացած մարտահրաւէրներն այլեւս թոյլ չեն տալիս շռայլութեան ու աւելորդութեան: Ու չպէտք է թոյլ տալ անգամ տեսական բախումների: Մենք այժմ այլ լուրջ խնդիրներ ունենք լուծելու:

Զրուցեց ՍՕՆԱ ԳՐԻԳՈՐԵԱՆԸ