Օգտուելով Հայաստանում գտնուելու առիթից  «yerkir.am»ը հարցազրոյց  անցկացրեց Սիրիայի Բերիոյ թեմի ազգային իշխանութեան ներկայացուցիչ՝  Կարօ Եուզբաշեանի հետ:

Ստորեւ ներկայացւում է հարցազրոյցը:

Արդէն բաւական ժամանակ ձգւում է Սիրիայի տագնապը: Ինչպիսի՞ն է համայնքի կացութիւնը  հոգեբանական, տնտեսական, արտագաղթի եւ այլ  առումներով:
Հայ համայնքը համեմատաբար կայուն վիճակի մեջ է՝ հակառակ տնտեսական եւ այլ տագնապալի իրավիճակներին: Կան աշխատանքի  դժուարութիւններ, որոնց պատճառով  անհատական բնոյթի գաղթի ե- րեւոյթներ են տեղի ունենում:


Այս դժուարին կացութեան մէջ ազգային կառոյցները կարողանո՞ւմ են դիմագրաւել նոր մարտահրաւէրները, լուծել համայնքի առօրեայ  խնդիրները:
Ազգային կառոյցները,  իրավիճակից  բխող որոշ նոր  կազմակերպական ձեւաւորումով  պատնեշի վրայ են եւ յաջողութեամբ կատարում են իրենց ազգային պարտականութիւնը՝ հասնելով ժողովրդի բազմազան կարիքների բաւարարմանը:


Այս  փորձութեան  պահին  սիրիահայութիւնը  զգո՞ւմ է ողջ  հայութեան ուշադրութիւնը: Ինչ ակնկալիքներ կան, աշխարհասփիւռ հայությունից  եւ մասնաւորապէս ՀՀ  պետութիւնից:
Նկատելի են ողջ հայութեան  օրէ-օր աւելացող նախաձեռնութիւնները: Ի մասնաւորի բարոյական եւ նիւթական զօրակցութիւնը: Այս բոլորի կողքին Հայաստանի  Հանրապետութիւնը յատուկ ուշադրութիւն է ցուցաբերում,  Հայաստանում գտնուող սիրիահայ քաղաքացիների նկատմամբ՝ ստեղծելով նրանց համար բազմապիսի դիւրութիւններ՝  կեցութեան, առողջապահութեան, կրթութեան, աշխատանքի հնարաւորութիւնների եւ այլ հարցերում:


Իսկ ինչպէ՞ս  է իրականացւում օգնութիւնների  բաշխումը: Նախ, որտեղ են կուտակւում օգնութիւնները, ովքեր են տնօրինում եւ ինչ սկզբունքով են բաշխում: Այս գործընթացում առաջանո՞ւմ են բարդութիւններ ու դժգոհութիւններ, թէ այդպիսի խնդիրներ չկան:
Ազգային իշխանութիւնների  նախաձեռնութեամբ   կազմուեց սիրիահայութեան շտապ օգնութեան կեդրոնական մարմինը՝  իր գործադիր ենթայանձնախմբերով: Հալէպի թէ շրջանի մէջ իրականացւում է առաք- ւած օգնութեան բաշխումը: Յաղթահարելով դժուարութիւնները  այս գործընթացը օր օրի կատարելագործւում է: Յիշեմ, որ Հայաստանում ստեղծուած «Օգնիր եղբորդ» նախաձեռնութեան կողմից, ինչպէս եւ Հայաստանի ու Արցախի ժողովրդի  ու գործարար շրջանակների օժանդակութեամբ, երեք հանգրուանով, ստացել ենք  աւելի քան 30 թոն բեռ՝ բաղկացած հիմնականում սննդամթերքից,  եւ դեղօրայքից: Այս բեռն արդէն բաժանել ենք Սիրիայի հայ եւ ոչ հայ քաղաքացիների: Երեւոյթն արժանացել է համապատասխան գնահատանքի:
Խօսակցութիւններ կան, թէ  օգնութիւնը ժամանակին տեղ չի հասնում:
Սփիւռքահայ տարբեր գաղթօճախներից հասնող դրամական օժանդակութիւնները  կուտակւում են Կիլիկիոյ  կաթողիկոսութեան մէկ յատուկ հաշուեհամարին: Դրանք  մեր պահանջով եւ կարիքներից  թելադրուած, յստակ  ժամանակացոյցով փոխանցւում են մեզ՝ օգտագործման համար: Բնականաբար յարմար ժամանակ, Բերիոյ  թեմի ազգային իշխանութիւնը, այս ամենի վերաբերեալ կը ներկայանայ ամբողջական հաշուետուութեամբ:

Ներկայումս  Սիրիան վերածուել է հակամարտող հոսանքների բախման դաշտի: Այս պայքարի մէջ  հայութիւնը  ինչպէ՞ս է կարողանում խուսափել ջրապտոյտի մէջ յայտնուելուց: Ինչպէ՞ս  է կարողանում խուսափել իր դէմ ուղղուած, այս կամ այն կողմի  թշնամանքից:
Սիրիայում սիրիահայութիւնը ճանաչուել եւ ապրել  է, որպէս  պարկեշտ քաղաքացի, մասնակցել է երկրի բարգաւաճման աշխատանքներին եւ այսօր,  որպէս սիրիայի քաղաքացի դէմ է եղբայրասպան կռիւներին, երկրի պառակտմանը, կողմ է Սիրիայի տարածքային ամբողջականութեան պահպանմանը՝  եւ խաղաղ միջոցներով տարակարծութեան լուծմանը: