«Միշտ մեծ պարտաւորութիւն զգացած եմ բարձր պահելու հայու պատիւը, որ ինծի համար ուղենիշ եղած է»
Հարցազրոյց` Artsakhpress.amի
Հայ մեծ բարերարին հանդիպեցանք Մոսկուայի հիւանդանոցներէն մէկուն մէջ, ուր ան կը բուժուէր: Հակառակ առողջական ծանր վիճակին` պարոն Հայրապետեան խոստացած էր հարցազրոյց տալ:
Պրն. Հայրապետեան, մեր առաջին հարցը կը վերաբերի ձեր առողջութեան, ինչպէ՞ս կը զգաք:
Առողջութիւնս վատ է, բայց հայու պատիւը պայքարելու ուժ կու տայ ինծի: Ներկայիս բուժում կը ստանամ, յուսամ` ամէն ինչ լաւ կ՝ըլլայ…
Խօսինք Ղարաբաղէն, կը պահէ՞ք արդեօք կապը Ղարաբաղի, ձեր ծննդավայրի` Վանքի հետ:
Ղարաբաղի հետ իմ կապը ամէն օր է: Կ՝ուրախանամ, երբ կը լսեմ իւրաքանչիւր ծնող նոր երեխայի մասին, եւ կը տխրիմ` սահմանին կորսնցուցած իւրաքանչիւր կեանքի համար:
Վանքի մէջ կը շարունակուին այն բոլոր ծրագիրները, որոնք սկսած եմ ժամանակին: Կը գործէ նախապէս կառուցուած փայտամշակման գործարանը, վերջերս բացուած է քարի գործարանը: Իրագործուած եւ ընթացիկ ծրագիրներով ստեղծուած է 209 աշխատատեղ` ե՛ւ Վանքի, ե՛ւ հարեւան գիւղերու բնակիչներու համար:
Վանք գիւղին մէջ ստեղծուած տնտեսութեան կառավարման եւ ծրագիրներու իրագործման համար, նշանակած եմ պատասխանատուներ: Անոնց միջոցով կը տեղեկանամ ինչպէս ծննդավայրիս նորութիւններուն, այնպէս ալ ծրագիրներու ընթացքին մասին: Ստեղծած եմ նաեւ համապատասխան աղբիւր` ծրագիրներու տնտեսաւորման համար:
Գիտենք, որ Արցախի մէջ շատ ծրագիրներ կան, որոնք դեռ ընթացքի մէջ են: Իսկ կա՞ն արդեօք նոր ծրագիրներ, գաղափարներ, զորս կ՝ուզէք յառաջիկային կեանքի կոչել:
Ծրագիրներ շատ կան: Մասնաւորապէս Վանք գիւղին մէջ ներկայիս կը փորձեմ ձիարշաւարան կառուցել: Այդ նպատակով Հոլանտայէն եւ Անգլիայէն արցախեան ցեղատեսակի մօտ 50 ձի բերած ենք Արցախ:
Ընթացքի մէջ են նաեւ որսորդական տնտեսութեան ստեղծման աշխատանքները, որուն նպատակը զբօսաշրջութեան զարգացման նպաստելն է: Անիկա պատրաստ ըլլալուն պէս, Արցախ ժամանած զբօսաշրջիկները կրնան - համապատասխան պետական վճարումներ կատարելէ ետք - որսորդութեամբ զբաղիլ անտառներու մէջ, ուր առայժմ արգիլուած է որսը, եւ տարբեր վայրի կենդանիներ բազմացած են:
Արցախի բարգաւաճումն ու հզօրացումը իմ եւ բոլորիս խնդիրն է, եւ ես համոզուած եմ, որ հեռու չէ այդ օրը:
Արցախի մէջ բազմաթիւ ծրագիրներ իրագործած էք` արժանանալով ժողովուրդի սիրոյն ու երախտիքին: Ըստ ձեզի` ո՞րն է ձեր գլխաւոր ներդրումն ու ձեռքբերումը Արցախի մէջ, ի՞նչ տուած էք եւ ստացած ձեր հայրենիքէն:
Համեստօրէն պիտի ըսեմ, որ այն ամէնը ինչ ըրած եմ յանուն հայրենիքի, ինծի համար կարեւոր էր այնքան, որ վարակիչ եղած է նաեւ շատերու համար: Դեռ պատերազմի ժամանակ ես կը զբաղէի Գանձասարի վանքի վերականգնման աշխատանքներով: Ինծի յաճախ կ՝ըսէին, որ անիմաստ գործով զբաղած եմ, երբ քանի մը քիլոմեթր այն կողմ պատերազմ է: Սակայն իմ խնդիրն էր մարդոց ոգեւորել, ոգեշնչել, քանի որ ան, որ դեռ պատերազմը չաւարտած կը սկսի կառուցել, կը հաւատայ իր յաղթանակին:
Ես միշտ հաճոյք ստացած են հայրենիքին ցուցաբերած իւրաքանչիւր աջակցութենէն: Ատիկա առաւել շատ արեան կանչ էր, քան ներքին պահանջ: Հայրենասիրութիւնը իմ արեան մէջ դրուած է: միշտ մեծ պարտաւորութիւն զգացած եմ բարձր պահելու հայու պատիւը, որ ինծի ուղենիշ եղած է: Ամէն կերպ փորձած եմ թեթեւցնել հայրենակիցներուս մտահոգութիւններն ու լուծել անոնց խնդիրները` ըլլայ հայրենիքի մէջ, թէ՝ սփիւռքի:
Կը ներէք, բայց չեմ կրնար շրջանցել ձեր եւ մեր բոլորի համար ամենացաւոտ թեման` ձեր դէմ սկսած դատական գործընթացը: Ի՞նչ սպասել…
Չեմ ուզեր նորէն անդրադառնալ եղածին, այդ մասին շատ խօսուած է: Ներկայիս, առողջական վիճակէս մեկնելով, պարբերաբար կը յետաձգուի դատական ընթացքը: Չեմ կրնար զսպել յուզումս, երբ գիտեմ, որ շատ հայ ընտանիքներ, որոնք ինծի անձնապէս չեն ալ ճանչնար, կը հետեւին իմ դէմ սկսած դատական գործընթացին, կը հետաքրքրուին իմ առողջութեամբ, անկեղծ կը ցաւին ինծի համար: Ատիկա ինծի ամէն օր հպարտանալու, սիրելու, կարօտնալու եւ ապրելու ուժ կու տայ:
Կ՝ուզեմ պարզապէս նշել, որ շատ կը փափաքիմ` արդարութիւնը յաղթէ… Յոյսով եմ` այդպէս ալ պիտի ըլլայ, եւ ես կրկին պիտի վերադառնամ Արցախ, ուր դեռ շատ ծրագիրներ ունիմ իրագործելու:
Արցախը այս տարի պիտի նշէ Անկախութեան հռչակման մէկ քառորդ դարը: Այս տարիներուն դուք միշտ եղած էք անոր կողքին եւ նեցուկ կանգած էք` որքան ու ինչպէս կրցած էք: Ձեր շնորհաւորանքի խօսքը:
- Ի սրտէ կը փափաքիմ շնորհաւորել ամբողջ հայութիւնը եւ, առանձնապէս, արցախցիները` Անկախութեան 25րդ տարեդարձին առիթով: Գիտէք` դարեր շարունակ հայ ժողովուրդը երազած է անկախութեան մասին, եւ պատմութեան մէջ չենք ունեցած այնպիսի նախադէպ, ինչպէս Արցախեան գոյապայքարին ունեցած ձեռքբերումը, երբ 125 հազար բնակչութիւն ունեցող երկիրը յաղթանակ տարաւ 7 միլիոնանոց պետութեան դէմ:
Ի հարկէ, այդ պատերազմին միահամուռ ու միասնական ուժերով կը պայքարէր ամբողջ հայութիւնը, սակայն հիմնական հարուածը անմիջապէս իր վրայ կը կրէր Արցախի մէջ ապրող ժողովուրդը, որ շատ տաղանդաւոր է, եւ վաստակած է իր բարեկեցիկ ու արժանապատիւ ապագան իր իսկ պապերու հայրենիքին մէջ կառուցելու իրաւունքը: