Խորէն արք. Բարոյեան բարեջան առաջնորդ հայոց Լիբանանի, հովուական այցելութիւն տուաւ Հայաշէնի Ս. Յովհաննու Կարապետ եկեղեցւոյ եւ անոր զաւակներուն, եկեղեցւոյս տօնին առիթով, 14 Յունուար 1962 Կիրակի օր:

Առտուան ժամը 8:00-ին, թաղականութեան անդամները, թաղի  միութեանց եւ կազմակերպութեանց ներկայացուցիչները պատշաճ ընդունելութեամբ սրբազան հայրը առաջնորդեցին եկեղեցի: Թաղի երկայնքին դէմ առ դէմ շարքի կեցած էին Ազգային Թորգոմեան վարժարանի աշակերտները: Օգնութեան Խաչի արծուիկները եւ ՀՄԸՄ-ի սկաուտները, որոնք որոտընդոստ ծափերով օդը կը թնդացնէին: Հանդիսաւոր Ս. պատարագի ընթացքին, զոր մատոյց Վահան քահանայ Ղազարեան, սրբազան առաջնորդ հայրը խօսեցաւ յաւուր պատշաճի հոգեշունչ քարոզ մը: Ս. Յարութեան պատկերին օծումէն ետք հինգ պատանիներու դպրութեան օծումը եւ անոնցմէ երեքին ուրարի տուչութիւնը կատարեց: Մատաղի օրհնութենէն յետոյ Ազգային Թորգոմեան վարժարանի սրահին մէջ հիւրասիրուեցան սրբազան հայրը, եկեղեցական հայրեր, ազգային երեսփոխաններ, թաղիս կազմակերպութիւններուն ներկայացուցիչները եւ վարժարանի ուսուցչական կազմը: Ոգեւոր մթնոլորտի մէջ սրբազան հայրը մաղթեց, որ օր մը հայրենիքին մէջ հա- ւաքուինք բոլորս ալ, մեր հայկական դիմագիծը պահած, դրուատեց հայ երիտասարդութիւնը մատնանշելով անոր կարեւորութիւնը՝ իբրեւ մեր ազգին ապագան: Արտաշէս Տ. Խաչատուրեան թաղականութեան կողմէ բարի գալուստ մաղթեց եւ շնորհակալութիւն յայտնեց առաջնորդ սրբազան հօր եւ յարգելի հիւրերուն, որոնք պատուեցին Հայաշէնի հայութիւնը իրենց այցելութեամբ: Թաղականութեան, թաղիս կազմակերպութիւններու եւ Հայաշէնի հայութեան կողմէ վարժա- րանիս ուսուցչուհիներէն Մարի Սարգիսեան կարդաց ուղերձ մը: Թորգոմեան վարժարանի տնօրէն Խորէն Մղտեսեան ճաշկերոյթ մը կազմակերպած էր ի պատիւ սրբազան հօր եւ ազգային մարմիններու ներկայացուցիչներուն: