Print
Category: «Ազատ Օր»ի նիւթերէն՝ 50 տարի առաջ

- Հայաստանի Գիտութիւններու Ակադեմիայի աշխատակիցները սկսած են գրել մատենագրական գիրք մը, որուն վերնագիրը պիտի ըլլայ «Գիտութիւնը Հայաստանի մէջ՝ վերջին կէս դարուն»։ Այնտեղ պիտի նշուին 1920էն ի վեր Հայաստանի մէջ լոյս տեսած գիտական բոլոր գործերուն անունները եւ կենսագրական կարճ տեղեկութիւններ պիտի տրուին անոնց հեղինակներուն մասին։ Եօթը խոշոր հատորներէ բաղկացած գիրքը 1970 թուականին լոյս պիտի տեսնէ ականաւոր գիտնականներ Արարատ Ղարիպեանի, Վարդան Կուլկանեանի եւ ուրիշներու ղեկավարութեան տակ։

- Արեւելեան Գերմանիոյ Ակադեմիայի Յունահռոմէական պատմութեան ուսումնարանը՝ Հայաստանի Պատմական Թանգարանէն խնդրած է, որ Արին Բերդի պեղումներու ընթացքին գտնուած հին դրամներու մասին տեղեկութիւններ տրուին իրեն։ Փոքր Ասիոյ արծաթեայ այս դրամները կը փաստեն, որ առեւտրական կապեր գոյութիւն ունեցած են Հայաստանի ու Միջերկրականի ծովեզերեայ քաղաքներու միջեւ։ Պատմական գիտութիւններու թեկնածու դրամագիտական ճիւղի վարիչ Խ. Մուշեղեան գոհացում տուած է գերմանական ուսումնարանի խնդրանքին։ Ասկէ զատ, Անգլիոյ Օքսֆորտ Համալսարանի դասախօսներէն Թիչըրզ, որ կþուսումնասիրէ Սելճուկներու Փոքր Ասիա արշաւանքի պատմութիւնը, Հայաստանի գիտուններէն խնդրած է, որ այդ ժամանակաշրջանին վերաբերող տեղեկութիւններ տան իրեն։ Անգլիացի գիտունին ղրկուած է Խ. Մուշեղեանի «Դրամական շրջանառութիւնը Դուինի մէջ» գիրքը, որ հրատարակուած է ռուսերէն լեզուով։

- Ամերիկահայ կենսաբան փրոֆ. Զարեհ Պտուկեան, Հայաստանի Պատմական Թանգարանին նուիրած է՝ Կիլիկիոյ թագաւորութեան ¥12-14րդ դարեր¤ շրջանին պատկանող եւ 360 արծաթ ու ոսկի դրամներ պարունակող իր հաւաքածոն։ «Կիլիկիոյ թագաւորութեան դրամները» խորագրով իր գրքին հրատարակումէն ետք, փրոֆ. Պտուկեան մեծ անուն հանած է Հայաստանի մէջ։