Կռփամարտ. Արթուր Աբրահամ պաշտպանեց աշխարհի ախոյեանի տիտղոսը

Հայ արհեստավարժ կռփամարտիկ, գերմիջին կարգի «WBO»-ի աշխարհի ախոյեան Արթուր Աբրահամ (40-4, 28՝ նոք-աութ), աշխարհի ախոյեանի տիտղոսի պաշտպանութեան համար մղուած մենամարտին յաջողեցաւ յաղթել 35 տարեկան սերպ կռփամարտիկ Նիքոլա Սիեքլոչային (26-2, 8՝ նոք-աութ):

12 ռաունտ տեւած մենամարտէն ետք ռինկին իրաւարարները հաշուեցին երկու կռփամարտիկներուն ապահոված կէտերը (116-113, 116-112 եւ 119-110) եւ յաղթական հռչակեցին Արթուր Աբրահամը: Այսպիսով, Աբրահամ յաջողեցաւ պաշտպանել գերմիջին կարգի «WBO»-ի աշխարհի ախոյեանի իր տիտղոսը, որուն տիրացած էր Ռոպերթ Շթիքլիցին յաղթելէ ետք:

Ծանրաբարձութիւն - Եւրոպայի երիտասարդական ախոյեանութիւն.
Հայաստան տիրացաւ 2 ոսկի, 1 արծաթ եւ 3 պրոնզ մետալի

Լեհաստանի Ցեխանուվ քաղաքին մէջ տեղի ունեցող Եւրոպայի ծանրաբարձութեան երիտասարդական ախոյեանութեան մրցումներուն, Հայաստան տպաւորիչ արդիւնքներ արձանագրելով տիրացաւ 2 ոսկի, 1 արծաթ եւ 3 պրոնզ մետալի:
17 տարեկան Սիմոն Մարտիրոսեան, որ ելոյթ ունեցաւ գերծանր կշիռի դասակարգի մրցումներուն՝ արձանագրելով 397 քկ (182 եւ 215), տիրացաւ ոսկի մետալին, 49 քիլոկրամով գերազանցելով 2-րդ դիրքին վրայ գտնուած ռուս Եուրի Ահմետովի արձանագրած արդիւնքը (151 եւ 190):
Իր կարգին, Մարզպետ Մինասեան տիրացաւ ոսկի մետալի, մինչ Սամուէլ Գասպարեան՝ արծաթ մետալի: Պրոնզէ մետալի տիրացան Լեւոն Մանուկեան, Հրայր Մկրտչեան եւ Դաւիթ Յովհաննիսեան: Այս ախոյեանութեան Հայաստանը կը ներկայացնեն Մարզպետ Մինասեան, Համլեթ Մնացականեան (50 քկ), Հրայր Յովհաննիսեան, Լեւոն Մանուկեան (56 քկ), Դաւիթ Յովհաննիսեան (69 քկ), Յակոբ Մկրտչեան (77 քկ), Սամուէլ Գասպարեան (85 քկ) եւ Սիմոն Մարտիրոսեան (94 քկ եւ վեր):

Մխիթարեանի թանկագին կոլը

Գերմանիոյ ֆութպոլի ախոյեանութեան 33-րդ հանգրուանի մրցումներուն, Պորուսիա Տորթմունտ 3-2 արդիւնքով յաղթեց Հոֆընհայմին:
Յաղթական կազմին մարզիկներէն Հենրիխ Մխիթարեան նշանակեց Տորթմունտի երկրորդ կոլը (31-րդ), մինչ արդիւնքը կ՛ընթանար 1-1 արդիւնքով: