Հայաստանն ու Արցախը շատ արագ ձեռնամուխ եղան իրարու կապող ռազմավարական, ընկերա-տնտեսական կարեւոր նշանակութիւն ունեցող նոր ճանապարհի կառուցման:
Միջոցները այդ նպատակով հանգանակուեցան «Հայաստան» համահայկական հիմնադրամի 2013-ի ամենամեայ հեռուստամարաթոնի ընթացքին, իսկ 2014-ի սկիզբը արդէն մեկնարկեցին եւ հարթ կերպով կ'ընթանան Վարդենիս-Մարտակերտ ճանապարհի շինարարական աշխատանքները: Ըստ «Արմէնփրես»-ի՝ այս մասին յայտնած են «Հայաստան» համահայկական հիմնադրամի շինարարական բաժինէն: Այժմ ճանապարհի կառուցման աշխատանքներուն մէջ ներգրաւուած է վեց շինարարակական կազմակերպութիւն: «Եղանակը բարենպաստ է, եւ արդէն 10-15 օրէ ի վեր շինարարակական կազմակերպութիւնները կ'իրականացնեն հողային աշխատանքները»,-հաղորդած են հիմնադրամի շինարարական բաժինէն՝ նշելով, որ աշխատանքները յատկապէս կ'ընթանան Վարդենիս-Մարտակերտ ճանապարհի արցախեան հատուածին վրայ:
Վարդենիս-Մարտակերտ ճանապարհը պիտի ըլլայ 116 քմ., նոր ճանապարհին տակ պիտի տեղադրուին ջրահեռացման համակարգեր՝ անձրեւաջուրերուն քայքայումէն ճանապարհը պաշտպանելու համար: Վաթսուն թոն բեռնատարողութեան համար նախատեսուած ճանապարհին մերձակայ լեռնալանջերը պիտի ամրացուին: Պիտի կառուցուին ժայռի եւ ճանապարհի միջեւ արտաքին եւ ներքին արգելապատնէշներ՝ ‘ քարաթափերէ պաշտպանելու համար: Ճանապարհի երկայնքով կը գտնուի 30 գիւղ, պիտի կառուցուին ճանապարհային 16 կամուրջներ:
Հայաստանաբնակ եւ աշխարհասփիւռ հայերը «Դէպի Արցախ» խորագիրող 16-րդ ամենամեայ հեռուստամարաթոնի ժամանակ 2013-ի Նոյեմբեր 29-ին հանգանակեցին աւելի քան 22 միլիոն 661 հազար 372 տոլար: