ՍՏԵՓԱՆԱԿԵՐՏ, «Արմէնփրէս-Արցախփրէս».- 2013ին Լեռնային Ղարաբաղի Հանրապետութեան մուտքի վիզաներ ստացած անձերուն մէջ գերակշռած են ԱՊՀ երկիրներու քաղաքացիները:

«Արցախփրէս»ին հետ ունեցած զրոյցին ընթացքին այս մասին յայտնած է Լեռնային Ղարաբաղի Հանրապետութեան արտաքին գործոց նախարարութեան հիւպատոսութեան բաժինի պետ՝ Կարինէ Աւետիսեանը: Մուտքի վիզա ստացած օտար քաղաքացիներու տասնեակին մէջ առաջին դիրքը գրաւած է Ռուսիան (8927), ապա՝ Միացեալ Նահանգները (1252), Ֆրանսան (673), Իրանը (560), Ուքրանիան (452), Գերմանիան (405), Լեհաստանը (338), Լիբանանը (291), Թուրքմէնստանը (264) եւ Իտալիան (197):

Աւետիսեանի համաձայն՝ նախորդ տարի մուտքի վիզա տրուած է ընդհանուր առմամբ 16 հազար 317 քաղաքացիի, որոնց մէջ ԱՊՀ երկիրներէն՝ 9971 քաղաքացիներ, իսկ այլ երկիրներէ՝ 6346։ 2013ին Լեռնային Ղարաբաղ այցելած օտար քաղաքացիներուն թիւը՝ 2012ին հետ բաղդատելով, աւելցած է 805ով: Անցած տարի առաջին անգամ Լեռնային Ղարաբաղ մուտքի վիզաներ ստացած են Ֆիճիի, Լիպիոյ եւ Ֆիլիփիներու քաղաքացիներ: