ԵՐԵՒԱՆ, «Արմէնփրէս».- Արցախի Տիգրանակերտի թանգարանը մինչեւ տարեվերջ նոր ցուցադրութեան վայր պիտի ունենայ, յայտնած է Արցախի Տիգրանակերտի արշաւախումբի ղեկավար Համլէտ Պետրոսեանը՝ «Արմէնփրէս»ին հետ ունեցած զրոյցին ընթացքին։
Տիգրանակերտի թանգարանի ներկայի ցուցադրութեան մէջ տիրական է խեցեղէնը: Նոր ցուցադրութիւնը կարելիութիւն պիտի տայ ներկայացնելու նաեւ Տիգրանակերտի հնավայրին մէջ պեղումներու ատեն յայտնաբերուած այլ նիւթեր՝ հիմնականին մէջ երկաթեայ: «Նոր ցուցադրութեան պլանի մշակումն արդէն աւարտուած է, նիւթերն էլ ընտրուել են: Մնում է լուծել որոշ քարտէզների եւ տեքստերի հարցեր: Եթէ համապատասխան ֆինանսաւորում ունենանք, կը լուծենք նաեւ կահոյքի եւ դիզայնի հարցերը», նշած է Համլէտ Պետրոսեան:
Անոր համաձայն՝ Տիգրանակերտի թանգարանի այցելուները յաճախ կը բաւարարուին միայն թանգարան այցելելով: «Տարեկան 20-30 հազար այցելու ենք ունենում, որոնցից միայն 3 հազարն օտարերկրացիներ են, իսկ 5 հազարն էլ օտար երկրներում բնակուող հայեր են», յայտնած է ան։
Հնագէտին տուեալներով՝ Տիգրանակերտը Արցախի մէջ Գանձասարէն եւ Շուշիէն ետք երրորդ ամէնէն աւելի այցելու ունեցող վայրն է:
Համլէտ Պետրոսեան նշած է, որ այս տարի պիտի լուծուի հնագէտներու հանգրուանի հարցը: «Առաջ մենք տուն էինք վարձում, այնտեղ էլ թողնում էինք մեր բոլոր գործիքները: Հիմա արդէն կը բնակուենք հնավայրին կից տնակներում», աւելցուցած է ան: