ՀՅԴ Երեւանի Մարզային կոմիտէի ներկայացուցիչ ընտրուած է Լիլիթ Գալստեան: Նման որոշում կայացուած է անցեալ շաբաթ կայացած ՀՅԴ Երեւանի մարզային 17-րդ ժողովին:
Այս առնչութեամբ, ՀՅԴ Երեւանի մարզային կոմիտէի տարածած հաղորդագրութեան մէջ, մասնաւորապէս, ըսուած է. «Երեւանը ներկայացնող շուրջ 60 պատուիրակներ քննեցին ՄԿ-ի գործունէութիւնը, գնահատականներ տրուեցին ՀՀ ԱԺ, ՀՀ նախագահի եւ Երեւան քաղաքի աւագանու ընտրութիւններում ՀՅԴ արձանագրած հետընթացին, վերջինիս պատճառներին եւ հետեւանքներին, կառոյցում առկայ բարոյահոգեբանական մթնոլորտին: Հանրապետութիւնում տիրող քաղաքական տնտեսական, ժողովրդագրական ու հոգեբարոյական իրողութիւնները ժողովը որակեց տագնապահարոյց՝ երկրի զարգացման հեռանկարը վտանգող:
«Ժողովը միաժամանակ հաստատեց իր յանձնառութիւնն ու պատասխանատուութիւնը ՀՅԴ-ի նկատմամբ երեւանցիների վստահութիւնն ամրացնելու, զարգացող Երեւանի, պաշտպանուած եւ իրաւատէր երեւանցու համար լրացուցիչ ջանքեր գործադրելու, քաղաքացիների մէջ բարոյական քաղաքականութեան, ժողովրդավարական արժէքների յաղթանակի նկատմամբ համոզումի հաստատման ուղղութեամբ:
«ՀՅԴ Երեւանի կառոյցը լիարժէք օգտագործելու է իրեն վերապահուած քաղաքական մարմնի լիազօրութիւններն ու գործառոյթները տեսանելի ներդրում ունենալու Երեւան քաղաքի եւ երեւանցիների համար կենսական խնդիրների բարձրացման ու լուծման, մայրաքաղաքում սոցիալական արդարութեան եւ հանրային համախոհութեան մթնոլորտի ձեւաւորման ուղղութեամբ:
«Երեւանի խնդիրների շուրջ տեսակէտների բիւրեղացման եւ համախոհների շրջանակը ընդլայնելու նպատակով Մկ-ն նախաձեռնելու է հասարակակական-քաղաքական խորհրդակցութիւնների, կլոր սեղանների շարք՝ համագործակցութեան եզրեր գտնելու մայրաքաղաքի խնդիրներով մտահոգ ՀԿ-ների եւ հասարակական-քաղաքական, քաղաքացիական ուժերի հետ:
«Ճշտուած առաջնահերթութիւնների եւ համաքաղաքային հնչեղութիւն ունեցող խնդիրների շուրջ Մկ-ն հնարաւոր գործակցութեան ձեւաչափեր է որդեգրելու նաեւ Երեւանի քաղաքապետարանի հետ»: