Մայիս 29ին, Ազգային Ժողովին մէջ սկսած է Հայաստանի 2012ի պետական պիւտճէի տարեկան հաշուետըւութեան քննարկումը: Վարչապետ Տիգրան Սարգսեան ներկայացուցած է տնտեսական հիմնական ցուցանիշները, եկամուտները, ծախսերն ու բացը:

2012 թուականին արձանագրուած է 7,2% տնտեսական աճ:

12 ամսուան միջինով, սղաճը կազմած է 3,2%:

Արձանագրուած է պետական պիւտճէի եկամուտներու 7,4% անուանական աճ, իսկ ծախսերու՝ 2% աճ:

Արտածումը աճած է 7%‘ կազմելով 1428,1 միլիոն տոլար, իսկ ներածումը՝ 2,9%‘ կազմելով 4266,8 միլիոն տոլար:

2012ին համախառն ներքին արդիւնքը (ՀՆԱ-PIB) եղած է 7,2%:

Տնտեսութեան գլխաւոր չորս ճիւղերուն մէջ արձանագրուած են աճի ցուցանիշներ: Այսպէս, արդիւնաբերութեան բնագաւառի աճը կազմած է 5,7%, գիւղատնտեսութեան‘ 9,3%, շինարարութեան‘ 0,5%, ծառայութիւններու‘ 8%:

Վարչապետ Տիգրան Սարգսեան ներկայացուցած է նաեւ պետական պիւտճէի բացը: 2012ի պիւտճէն փակուած է 59,9 միլիառ դրամ բացով:

2012ին Հայաստանի պետական պարտքը կազմած է 1 թրիլիոն 508 միլիառ դրամ, կամ 3 միլիառ 738 միլիոն տոլար: Ըստ Տիգրան Սարգսեանի, պետական պարտքը կառավարելի է, քանի որ ՀՆԱ-ի համեմատականութեամբ‘ ան չէ գերազանցած 50 տոկոսի շեմը: