ՀՀ Ազգային ժողովէն ներս, արտահերթ կարգով, երէկ քննարկուեցաւ «Ժառանգութիւն» խմբակցութեան պատգամաւորներու հեղինակած օրէնսդրական նախաձեռնութիւնը, ուր կÿառաջարկուի փոփոխութիւն կատարել «Ընտրական օրէնսգրքում», որ թոյլ պիտի տայ ընտրութիւններէն յետոյ հրապարակել ընտրութեան մասնակցած քաղաքացիներու ցուցակները:
Նախագիծը պաշտպանած են Հ.Յ.Դ., ՀԱԿ եւ ԲՀԿ խմբակցութիւնները, սակայն գլխադասային յանձնաժողովը եւ կառավարութիւնը նախագիծի դրական եզրակացութիւն չեն տուած:
«Ձեր առաջարկած տարբերակը լաւագոյնը չէ: Մինչեւ յաջորդ հանրապետական ընտրութիւններ դեռ բաւական ժամանակ կայ: Ես ուղղակի այս պահին, հանպատրաստից կարող եմ մի առաջարկ անել` ցուցակներում, երբ լրացուցիչ անուններ են ընդգրկւում, մեքանիզմներ գտնենք, որոշ խմբերի անունների ընդգրկումը թող աւելի խստացուի, մի քանի ֆիլտրով թող անցնի»,- ըսաւ արդարադատութեան նախարար Հրայր Թովմասեանը։
«Դուք պէտք է ընդամէնը մէկ բան ասէք` չէք ընդունում այս առաջարկութիւնը, որովհետեւ վախենում էք, թէ այն կարող է խփել ձեր իշխանութեանը»,- արձագանգեց «Ժառանգութիւն» կուսակցութենէն Ռուբէն Յակոբեանը։
«Այս իշխանութիւնը 2 բան երբեք չի ընդունի` 100% համամասնական ընտրակարգ եւ ցուցակների հրապարակում: Չի ընդունի, որովհետեւ երկուսն էլ թոյլ չեն տալու ցանկացած տեսակի կեղծիքներով ընտրութիւններ անցկացնել ու յետոյ յայտարարել, թէ ընտրութիւններն անցել են առանց խախտումների»,- կտրուկ ըսաւ ՀՅԴ խմբակցութեան ղեկավար Արմէն Ռուստամեանը։
Կառավարութիւնն ինքն իր դէմ չի պայքարելու
Հայաստանի Ազգային ժողովի ՀՅԴ խմբակցութեան ղեկավար Արմէն Ռուս- տամեան կատարեց հետեւեալ յայտարարութիւնը՝ Հայաստանի կառավարութեան գործունէութեան ծրագիրին մասին:
Սիրելի՛ հայրենակիցներ
Կառավարութիւնը կրկին ներկայացրեց իր ծրագիրը: Ի՞նչ ակնկալիք կարող է ունենալ մեր քաղաքացին այս ծրագրից ու կառավարութիւնից: Ցաւօք, ոչ մի լուրջ դրական տեղաշարժ իմաստ չունի սպասել: Նախ եւ առաջ այն պատճառով, որ այս ծրագիրը, ըստ էութեան, կապ չունի Հայաստանի հետ եւ բացարձակապէս չի համապատասխանում մեր երկրի առջեւ ծառացած մարտահրաւէրներին:
Իսկ կառավարութիւնը տիպիկ դրսեւորումն է վերարտադրուող իշխանութեան, նրա իրական պատկերն է: Դրա համար էլ կառավարութիւնը չի փոխուել, ինչպէս չի փոխւում վերարտադրուող իշխանութիւնը: Եթէ մէկը կասկածում է, թող փորձի լուրջ տարբերութիւններ գտնել վերջին շրջանի կառավարութիւնների մեջ: Ակնյայտ է, որ վերարտադրման բնոյթ ունեցող իշխանութեան մէջ չի կարող այլ կառավարութիւն լինել, քան այն, որը պարտաւոր է անխափան կերպով ապահովել այդ վերարտադրումը: Հետեւաբար, կառավարութեան իրական դերն ու նպատակը հէնց սա է, իսկ նրա ծրագիրը լոկ այս իրողութեան քողածածկոյթն է: Հէնց այս պատճառով էլ կառավարութեան ծրագրի ներկայացումը Ազգային ժողովում վեր է ածւում սոսկ ընթացակարգով նախատեսուած մի ձեւական միջոցառման, ինչպէս այս իշխանութիւնների օրոք տեղի ունեցող ցանկացած գործընթաց‘ սկսած ընտրութիւններից: Աւելին՝ ծրագրի այս որակը եւ Սահմանադրութիւնը շրջանցող մենիշխանութեան կողմից հաստատուած Ազգային ժողով-կառավարութիւն ձեւական յարաբերութիւնները կառավարութեանը թոյլ են տալու միաժամանակ թէ՛ խուսափել որեւէ պատասխանատուութիւնից, անգամ՝ ներկայացուած ծրագիրը չկատարելու դէպքում, թէ՛ ներկայանալ որպէս մեր ժամանակների ամենայաջողուած կառավարութիւնը: Այս ամէնը մենք արդէն տեսել ենք:
Հիմա էլ խոստանում են պայքարել աղքատութեան, գործազրկութեան եւ արտագաղթի դէմ: Այն կառավարութիւնը, որի օրոք այս ամէնը նոր թափ ու ծաւալներ են ստացել, չի կարող դրա դէմ պայքարել: Այդպիսի բան չի լինում‘ ինքն իր դէմ կառավարութիւնը չի պայքարելու: Եթէ ժողովուրդը ուզում է յաջողուած պայքար մղել, պէտք է սթափուի, համախմբուի եւ պայքարի՝ օր առաջ ազատուելու այս միահեծան եւ ինքնագոհ իշխանութիւններից: