Այս տարի եւրատեսիլեան բեմին վրայ փորձերը կ'ընթանան առանց մասնակիցներու: Շուէտ կազմակերպիչները մասնակիցներուն կրկնօրինակող դերասաններու հետ փորձերը կ'ընեն:

Նախօրէին «Տորիանս» խումբի տղաները հնարաւորութիւն ունեցան Հայաստանէն դիտել իրենց առաջին փորձը՝ առանց անմիջական մասնակցութեան:

Այս տարի «Եւրատեսիլ 2013»-ի կարգախօսն է՝ We are one՝ «Մենք մէկն ենք»:

Մրցոյթի երկու եզրափակիչները տեղի կþունենան Մայիս 14-ին եւ 16-ին, իսկ եզրափակիչը՝ Մայիս 18-ին: Այս անգամ մրցոյթը տեղի պիտի ունենայ Շուէտի Մալմօ քաղաքին մէջ: «Եւրատեսիլ» երգի 2013 թուականի մրցոյթը թիւով 58-րդն է: Մրցոյթը հոն տեղի կ'ունենայ չորրորդ անգամ՝ շնորհիւ Ատրպէյճանի մէջ կայացած «Եւրատեսիլ 2012»-ին յաղթած Լորինի եւ իր «Էյֆորիա» երգի:

Ի տարբերութիւն նախորդ տարիներու՝ 2013-ի ելոյթներու հերթականութիւնը որոշած են կազմակերպիչները, եւ ոչ վիճակահանութեան միջոցով:

Հայաստանը ներկայացնող «Տորիանս»-ի մենակատար Գոռ Սուջեանը կը կատարէ Lonely Planet («Միայնակ մոլորակ») երգը, որ ընտրուած է հայ հեռուստադիտողներու եւ դատական կազմի համատեղ քուէարկութեամբ: Երգի համահեղինակն է աշխարհահռչակ Black Sabbath խումբի կիթառահար Թոնի Այոմին:

«Տորիանս» խումբի տնօրէն Արա Թադեւոսեանը լրագրողներու հետ հանդիպման ընթացքին նշեց, որ «ի տարբերութիւն շատ երգիչների, որոնց համար «Եւրատեսիլ»-ին մասնակցելը մեծ նուաճում է, սա «Տորիանս»-ի համար ստեղծագործական ճանապարհի փուլերից մէկն է»:

«Տորիանս»-ի տեսահոլովակը YouTube-ի մէջ ունի շուրջ 65.000 դիտում եւ մօտ 1200 հաւանութիւն՝ like, եւ մօտ 80 բացասական արձագանգ՝ dislike:

«Մեր գլխաւոր նպատակը երգի միջոցով մարդկանց հաղորդագրութիւն փոխանցելն է: «Եւրատեսիլ»-ին մրցութային չեմ վերաբերւում, որովհետեւ սպորտ չի, բայց համակրում ենք Իտալիայի, Մալթայի մասնակիցներին: Լաւ երաժիշտներ կան»,- ըսաւ «Տորիանս» խումբի մենակատար Գոռ Սուջեանը:

Հայաստանը անցած տարի չէր մասնակցած Ատրպէյճանի մէջ տեղի ունեցած մրցոյթին, իսկ այս տարի մրցոյթին մասնակցելու հայտ չեն ներկայացուցած Պոսնիան եւ Հերզեկովինան, Փորթուկալը, Սլովակիան եւ Թուրքիան: