ՀՀ նախագահ Սերժ Սարգսեանի հրաւէրով այսօր Նոյեմբեր 29-ին պաշտօնական այցով Հայաստան ժամանեց Թուրքմենստանի նախագահ Գուրբանգուլի Բերդիմուհամեդովը: «Զուարթնոց» օդանաւակայանին մէջ ան դիմաւորուեցաւ ՀՀ նախագահին կողմէ:
Թուրքմենստանի նախագահը այցի ծիրէն ներս հանդիպումներ պիտի ունենայ Հայաստանի նախագահի, Ազգային ժողովի նախագահի ու վարչապետի հետ: Կը նախատեսուի շարք մը 
բնագաւառներու մէջ երկու երկիրներու միջեւ համագործակցութեան զարգացման ու ընդլայնման ուղղուած փաստաթուղթերու ստորագրման արարողութիւն:
Հայ-թուրքմենական բարձր մակարդակի շփումները նոր թափ պիտի ստանան այս այցելութեամբ:
ՀՀ նախագահը այս առիթով ըսած է թէ Հայաստանը բարձր կը գնահատէ երկու երկիրներու միջեւ ձեւաւորուած յարաբերութիւնները ու անոնց յատուկ նշանակութիւն կուտայ: ՀՀ նախագահը ընդգծած է ուժանիւթի, փոխադրութեան, գիւղատնտեսութեան, արդիւնաբերութեան մարզերուն մէջ հա-մագործակցութեան անհրաժեշտութիւնը: