2013թ. Փետրուարին կայանալիք ՀՀ նախագահի ընտրու-  թիւնը մեր անկախ պետականութեան անցած ճանապարհը վերաիմաստաւորելու, երկրի ու հասարակութեան խնդիրները ճիշդ ձեւակերպելու, ժողովրդի բարեկեցութիւնն ապահովող գործողութիւններ նախանշելու, արտաքին  մարտահրաւէրները արժանապատուօրէն դիմակայելու բացառիկ հնարաւորութիւն է:

Ակնյայտ է, որ միայն մրցակցային, բովանդակութեամբ ազատ, արդար, նոր որակի ընտրութիւնների դէպքում կը վերականգնուի հասարակութեան վստահութիւնը, կը բարելաւուի բարոյահոգեբանական մթնոլորտը, երկիրը բնականոն, անվտանգ եւ թռիչքաձեւ զարգացման հեռանկար կ՛ունենայ:
Առ այդ՝ Հայ Յեղափոխական Դաշնակցութիւնը, այս յայտարարութեամբ, քաղաքական օրակարգ է բերում այն հիմնախնդիրները, որոնց առաջադրմամբ եւ լուծմամբ կարող ենք դուրս գալ տեւական տեղապտոյտից.
1. Ստեղծել ժողովրդի ազատ կամարտայայտութեամբ իշխանութեան ձեւաւորումն ու փոփոխութիւնը երաշխաւորող ընտրական համակարգ. բացառել ընտրակաշառքը, պետական-վարչական ռեսուրսի  օգտագործումը, անցում կատարել խորհրդարանի ընտրութեան 100 տոկոս համամասնական սկզբունքի:
2. Մինչեւ 2015թ. աւարտը նախաձեռնել Սահմանադրական փոփոխութիւններ՝ կառավարման խորհրդարանական համակարգի անցնելու նպատակով:
3. Իշխանութիւններին վերահսկելու եւ հակակշռելու նպատակով՝ օրէնքով երաշխաւորուած գործուն լծակներ տրամադրել ընդդիմութեանը: Մասնաւորապէս՝ Քաղաքացիական ծառայութեան խորհըրդի, Տնտեսական մրցակցութեան պաշտպանութեան եւ Հանրային ծառայութիւնը կարգաւորող յանձնաժողովների, ինչպէս նաեւ ստեղծուելիք հակակոռուպցիոն գործակալութեան ղեկավարումը վերապահել ընդդիմութեանը: Վերահսկիչ պալատի խորհրդում ընդդիմութեանը քուոտա ամրագրել:
4. Յստակ տարանջատել բիզնեսն ու քաղաքականութիւնը, ապահովել դատական իշխանութեան լիարժէք անկախութիւնը: Արմատական փոփոխութեան ենթարկել տնտեսական քաղաքականութիւնը՝ նպատակ դարձնելով նոր աշխատատեղերի ստեղծումը, արժանապատիւ վարձատրութիւնը եւ աղքատութեան վերացումը:
5. Ամրագրել պետութեան կազմակերպիչ-կարգաւորիչ դերակատարութիւնը հաւասար հնարաւորութիւններով հասարակութեան կայացման, բարիքների ստեղծման ազատութիւնը եւ դրանց բաշխման արդարութիւնը ապահովելու գործում: Սոցիալական քաղաքականութեան հիմքում դնել կենսապահովման նուազագոյն բիւջէի մեծութիւնը:
6. Արտաքին քաղաքականութեան մէջ որդեգրել ազգային-պետական այնպիսի ուղեգիծ, որի գերխնդիրն է հայկական պետականութեան անկախութեան, անվտանգութեան եւ ինքնուրոյնութեան ապահովումը:
7. ՀՀ եւ ԼՂՀ միջեւ կնքել ռազմաքաղաքական դաշինք: Ամրագրել, որ հիմնախնդրի լուծման հիմքը Արցախի բնակչութեան համա-ժողովրդական հանրաքուէներով արդէն իսկ արտայայտուած կամքն է: Բանակցութիւններում ապահովել ԼՂՀ կարգավիճակի եւ անվտանգութեան առաջնայնութիւնը:
8. Ետ կանչել ՀՀ ստորագրութիւնը հայ-թուրքական արձանագրութիւններից: Թուրքիայի հետ յարաբերութիւնները կարգաւորել՝ մեկնելով ազգային անվտանգութեան ռազմավարութիւնից, չվտանգելով հայ ժողովրդի նպատակների իրականացման, պատմական արդարութեան վերականգնման հեռանկարը:
Հայ Յեղափոխական Դաշնակցութիւնը համոզուած է, որ այս խնդիրների լուծումն է մեր առաջնահերթութիւնը: Նախագահական ընտրութիւններից յետոյ, յաջորդ հինգ տարիներին, պետական կառավարման արդիւնաւէտութիւնը պայմանաւորուած է լինելու ընտրուելիք նախագահի՝ այս մարտահրաւէրները գիտակցելու, ստանձնելու եւ լուծելու յանձնառութեամբ:
Մեկնելով այս հաստատումներից՝ ՀՅԴ Հայաստանի Գերագոյն մարմինը նախաձեռնում է քաղաքական քննարկումներ կուսակցութիւնների, հասարակութեան լայն շերտերի եւ մասնագիտական խմբերի հետ:
Այդ քննարկումների արդիւնքում Դաշնակցութիւնը կը յստակեցնի իր մասնակցութեան ձեւն ու տարողութիւնը նախագահական ընտրութիւններին:
Յարգելի հայրենակիցներ,
Մենք վստահ ենք՝ առկայ հիմնախնդիրների ճիշդ ձեւակերպումը գործի կէսն է արդէն: Ակնկալում ենք, որ դերակատար ուժերն ու հասարակութեան ակտիւ հատուածը կը համախմբուեն քաղաքական այս պլատֆորմի շուրջ:

ՀՅԴ ՀԱՅԱՍՏԱՆԻ ԳԵՐԱԳՈՅՆ ՄԱՐՄԻՆ