Երկուշաբթի, Սեպտեմբեր 10ի երեկոյեան, ճատրակի աշխարհի ախոյեանի տիտղոսին վերատիրացած Հայաստանի ազգային հաւաքականը, նախագահ Սերժ Սարգսեանի կողմէ դիմաւորուեցաւ «Զուարթնոց» օդակայանին մէջ, ուր նաեւ մեծ բազմութիւն մը հաւաքուած էր հայ վարպետները դիմաւորելու համար:
Պոլսոյ մէջ կայացած խմբային ճատրակի 40րդ մրցաշարքին մասնակցած Հայաստանի տղամարդկանց հաւաքականի կազմի անդամներն են Լեւոն Արոնեան, Գաբրիէլ Սարգսեան, Տիգրան Լեւոնի Պետրոսեան, Վլադիմիր Յակոբեան եւ Սերգէյ Մովսիսեան, իսկ խումբի գլխաւոր մարզիչն է Արշակ Պետրոսեան:
Դիմաւորման պաշտօնական արարողութենէն ետք, ախոյեանները՝ նախագահին գլխաւորութեամբ, ուղեւորուեցան Ազատութեան հրապարակ, ուր տեղի ունեցաւ տօնական համերգ մը, բազմահազար երկրպագուներու մասնակցութեամբ:
Հաւաքականի առաջատար Լեւոն Արոնեան յայտնեց. «Մենք գնացել էինք յաղթելու ոչ միայն մեզ համար, այլ հէնց այնտեղի՛ հայութեան համար: Ես ինձ անչափ հպարտ եմ զգում, քանի որ նման հաւաքականի մի մասնիկն եմ»:
Նախագահ Սերժ Սարգսեան Պարգեւատրեց Ախոյեանները
Հայաստանի նախագահ Սերժ Սարգսեան, որ միւենոյն ժամանակ Հայաստանի ճատրակի ֆետերասիոնին նախագահն է, երէկ հրամանագիրներ ստորագրելով պարգեւատրեց 2012-ի Ճատրակի միջազգային ողիմպիականին ախոյեան հանդիսացած Հայաստանի տղոց հաւաքականը: Այլ հրամանագիրով մը նախագահ Սարգսեան Ա. կարգի մետալով պարգեւատրեց Տ. Պետրոսեանի անուան ճատրակի տան տնօրէն Հրաչիկ Թաւադեանը՝ Հայաստանի մէջ ճատրակի զարգացումը խթանելու եւ հայրենիքին մատուցած ծառայութիւններուն համար:
Իսկ Բ. կարգի մետալ ստացաւ Արմէն Աղուզումցեան՝ ճատրակի մէջ հայրենիքին մատուցած ծառայութիւններուն համար: