Կռփամարտ. Արթուր Քիրաճեան՝ Մինսքի Միջազգային Մրցաշարքի Տիտղոսակիր

PanARMENIAN.Net լրատուական կայքէջը կը հաղորդէ, որ Մինսքի մէջ (Պիելոռուսիա) տեղի ունեցած կռփամարտի միջազգային մրցաշարքին 11 երկիրներու կարգին եղած է նաեւ Հայաստան, որ իր մասնակցութիւնը բերած է հինգ մարզիկով:

Այս մրցաշարքին մասնակցող մարզիկները եղած են որակաւոր՝ նկատի ունենալով, որ անոնց կարգին եղած են Լոնտոնի 2012-ի Ողիմպիական խաղերու 16 մասնակցող, ինչպէս նաեւ՝ աշխարհի չորս ախոյեան, կը տեղեկացնէ Հայաստանի Ողիմպիական կոմիտէին պաշտօնական կայքէջը:
Հայաստանի մարզիկներէն ամէնէն յաջող արդիւնքը արձանագրած է Արթուր Քիրաճեան, որ  64 քկ դասակարգին մէջ հանդիսացած է տիտղոսակիր՝ աւարտականին յաղթելով իր ղազախ մրցակիցին՝ Սապիթ Տուլեպփելքենովիին:
Հայաստանի բռնցքամարտի ազգային հաւաքականի գլխաւոր մարզիչն է Կարէն Աղամալեանը:

Ուու-Շու. Հայաստանի մարզիկները տիրացան միջազգային մրցաշարքին մետալներուն

19-20 Մայիսին Երեւանի Տինամօ մարզահամալիրին մէջ տեղի ունեցած ուու շուսանտայի միջազգային մրցաշարքին՝ մետալներուն մեծամասնութեան տիրացան Հայաստանի մարզիկները:
Ինչպէս կը տեղեկացնէ «Արմենփրես» լրատու գործակալութիւնը, 18-էն բարձր տարիքային մրցումներուն առաջնութեան տիրացան Գարիկ Թեւանեան (52 քկ), Գոռ Խաչատրեան (56 քկ), Մանուկ Հարոյեան (60 քկ), Սասուն Հայրապետեան (65 քկ), Յարութիւն Սիմոնեան (70 քկ) եւ Գոռ Նազարեան (80 քկ): 12-14 տարեկան դասակարգին մէջ՝ Գէորգ Շահվերտեան (30 քկ), Տարօն Այվազեան (36 քկ), Զոհրապ Աթաբեկեան (44 քկ), Հայկ Գասպարեան (48 քկ), Սամուէլ Պետրոսեան (52 քկ) եւ Հայկ Սարգսեան (52 քկ եւ վեր): 14-18 տարեկանէն վար դասակարգին մէջ՝ Ազատ Գէորգեան (36 քկ), Վրէժ Դաւթեան (48 քկ), Հայկ Վարդանեան (52 քկ) եւ Գեղամ Աւակիմեան (56 քկ): Իսկ 16-18 տարեկան դասակարգին մէջ տիտղոսակիր դարձան հետեւեալ մարզիկները. Վահէ Կիրակոսեան (44 քկ), Արմենակ Բաքմազեան (48 քկ), Էլպեք Սարգսեան (52 քկ), Աշոտ Յարութիւնեան (56 քկ), Նարեկ Կրպէեան (65 քկ) եւ Համլեթ Միրզոյեան (70 քկ):
Այս մրցաշարքին իրենց մասնակցութիւնը բերին հայաստանցի, ռուս, իրանցի, փաքիստանցի եւ իրաքցի 180 մարզիկներ: Նշենք, որ Փաքիստան եւ Իրաք առաջին անգամ ըլլալով է, որ կը մասնակցէին այս մրցաշարքին:
Այս մրցաշարքը նուիրուած էր Հայաստանի եւ Չինաստանի միջեւ դիւանագիտական յարաբերութիւններու հաստատման եւ Հայաստանի ուու - շուի ֆետերասիոնի գործունէութեան 20-ամեակին։

Հենրիխ Մխիթարեան՝ Շախտիոր Տոնեցքի 2011-2012 տարեշրջանի լաւագոյն մարզիկը

PanARMENIAN.Net լրատուական կայքէջը կը հաղորդէ, որ Հայաստանի ֆութպոլի ազգային հաւաքականի միջնապահ Հենրիխ Մխիթարեան իր ակումբին՝ Շախտիոր Տոնեցքի համակիրներուն կողմէ ընտրուած է 2011-2012 տարեշրջանի լաւագոյն մարզիկը՝ Ուքրանիոյ ֆութպոլի ախոյեանութեան մրցումներուն իր արձանագրած տպաւորիչ արդիւնքներուն համար: