Սակայն մինչ ճանաչումը, քաղաքական գործիչի կարծիքով, պէտք է քննարկուի Հայաստանի եւ Լեռնային Ղարաբաղի միջեւ ռազմավարական դաշինք կնքելու հարցը

Հ.Յ.Դ. Բիւրոյի ներկայացուցիչ  Հրանդ Մարգարեանի հարցազրոյցը «ԱՌԱՒՕՏ» օրաթերթին:

«Առաւօտի» հարցին, թէ Հ.Յ.Դ. 31-րդ ընդհանուր ժողովը հաւանութիւն տուե՞ց այն խնդրին, որն արծարծել էր ՀՅԴ խմբակցութիւնը՝ ԱԺ-ում քուէարկութեան դնելով կառավարութեան պատասխանատուութեան հարցը առկայ ձախողումների համար՝ ՀՅԴ Բիւրոյի ներկայացուցիչ Հրանդ Մարգարեանը պատասխանեց. «Այո, գնահատել ենք, թէ կառավարութեան ծրագրի եւ քաղաքականութեան գործադրման արդիւնաւէտութիւնը խիստ անբաւարար է եւ մտահոգիչ»:
Յաջորդող հարցին, թէ ըստ այդմ՝ ՀՅԴ-ն պնդո՞ւմ է կառավարութեան հրաժարականի հարցը՝ նա այսպէս արձագանգեց. «Սա աւելի շատ մարտավարական հարց է, որ վերաբերում է ՀՅԴ Հայաստանի Գերագոյն մարմնին»:

ԱՆՀՐԱԺԵՇՏ  Է, ՈՐ  ՄԻ  ԲԵՒԵՌ  ՁԵՒԱՒՈՐՈՒԻ

Խորհրդարանական ընտրութիւնների առնչութեամբ համոզմունք յայտնում է ՀՅԴ Բիւրոյի ներկայացուցիչ Հրանդ Մարգարեանը:

ՀՅԴ 31-րդ ընդհանուր ժողովում ընդունուած փաստաթղթերից առայժմ յայտնի է միայն յայտարարութիւնը: Սակայն ենթադրելի է, որ եղել են նաեւ առանձին բանաձեւեր: Դրանք հրապարակուելո՞ւ են:

Բնականաբար: Բանաձեւերի մեծ փաթեթ կայ՝ ամէն հարցի վերաբերեալ: Ընդհանուր ժողովը 4 տարին մէկ որոշում է սկսած միջազգային քաղաքականութիւնից՝ տարածաշրջանի, տարբեր երկրների, միջազգային կազմակերպութիւնների եւ այլ հարցերի նկատմամբ կուսակցութեան ընդհանուր ուղեգիծը 4 տարուայ համար: Որոշումների այն մասը, որ հանրութեան համար կարեւորութիւն ունի՝ հրապարակուելու է: 7-օրեայ ժողովը բանաձեւերի բաւական ծաւալուն փաթեթ ունի, որը միանգամից հրապարակելը նոյնիսկ դժուար է: Մի գրքոյկի չափ բանաձեւեր են:

Հայաստանի վերաբերեալ բանաձեւն արտացոլո՞ւմ է արդէն իսկ հրապարակուած յայտարարութեան մէջ առկայ այն գնահատականը, ըստ որի մեր պետութիւնը տակաւին ժողովրդավար, իրաւական եւ սոցիալական չէ:

Այո, դա ամբողջութեամբ այդպէս է: Ընդհանուր ժողովը նախ եկաւ հաստատելու մեր նախորդ եռամեակի քաղաքական ուղեգիծը, որ ունեցել ենք, նաեւ ՀՅԴ Հայաստանի Գերագոյն  մարմնի կողմից որդեգրուած քաղաքական ուղղութիւնը: Եւ այդ հաստատումը բխում է հէնց այդ տրամաբանութիւնից, որ իսկապէս՝ Հայաստանի ներքին թէ՛ ժողովրդավարական, թէ՛ սոցիալական, թէ՛ իրաւական առումով մենք տեսնում ենք լուրջ թերութիւններ ու բացթողումներ: Այդ առումով՝ մեր կեցուածքի շեշտադրումներն աւելի հզօրացել են:

Այսինքն՝ գնահատականներն աւելի կո՞շտ են լինելու:

Ե՛ւ աւելի են կոշտանալու, ե՛ւ դարձել են աւելի համակուսակցական կեցուածք: Եթէ նախապէս դա միայն Հայաստանի կազմակերպութեան որդեգրած ուղղութիւնն էր՝ այն այսօր արդէն համակուսակցական ուղղութիւն է: Կարծում եմ, Հայաստանի ներքին՝ հիմնականում սոցիալ-տնտեսական իրավիճակը, աւելի ծանրացել է, եւ բնական է, որ այդ որոշումները նաեւ կրել են այսօրուայ պայմանների դրոշմը: Դիրքորոշումները շեշտադրումների առումով աւելի են խստացել:

Թւում է, թէ ճգնաժամն արդէն հետեւում է: Ինչո՞ւ էք գտնում, թէ աւելի է ծանրացել իրավիճակը:

Ճգնաժամի նկատմամբ սխալ քաղաքականութեան եւ ընդհանրապէս՝  սոցիալ-տնտեսական սխալ քաղաքականութեան պատճառով՝ մենք ծանր ու դժուարին ենք գնահատում երկրի վիճակը: Եւ կարծում ենք՝ սրա մէջ չափազանցութիւն չկայ: Ամէն մի սովորական քաղաքացի կարող է վկայել դրա մասին: Մեր այսօրուայ կեանքը շատ աւելի ծանր է, քան մի քանի տարի առաջ: Եւ սա չի՛ կարող պատահական լինել, չի՛ կարող միայն արտաքին գործօնների պատճառով լինել: Կարող են այդ արտաքին գործօններն էլ դերակատար եղած լինեն, բայց երկիրն այս իրավիճակի է մատնուած հիմնականում  սոցիալ-տնտեսական քաղաքականութեան պատճառով:

Յայտարարութեան մէջ նշուած է, թէ ՀՅԴ «քաղաքական օրակարգի գլխաւոր առաջնահերթութիւնն ու համակուսակցական խնդիրը առաջիկայ համապետական  ընտրութիւնների նախապատրաստութիւնն է»: Խնդրեմ մանրամասնեք, թէ ինչ քայլեր է սա  նթադրում առաջիկայում: Թէ՞ գուցէ սպասելու էք քարոզարշաւի համար օրէնքով սահմանուած ժամկէտներին:

Ոչ:  Մենք գտնում ենք, որ ընտրութիւնը քաղաքական երեւոյթ է եւ կուսակցութիւններն այդտեղ շատ աւելի մեծ աշխատանք ունեն տանելու, քան բուն քուէարկութեան օրը: Այսինքն՝  ժողովրդին քաղաքականացնելու, մեր  ծրագիրը եւ գնահատումների տրամաբանութիւնը ներկայացնելու եւ քաղաքականապէս կազմակերպելու առումով մեծ աշխատանք կայ մեր առջեւ, որ իրականացուելու է անմիջապէս՝ ընդհանուր ժողովի այդ որոշման պահից սկսեալ: Մեր ընտրապայքարի իմաստը, էութիւնը պայմանաւորուած չէ մեր քուէների չափով: Ընտրապայքարը  մեզ համար միջոց է մեր գաղափարները տարածելու, ժողովրդին կազմակերպելու ու քաղաքականացնելու, մեր ծրագրերի շուրջ համախմբելու: Եւ այդ առումով՝ մեզ համար դա երկարատեւ պայքարի միջոց է ու հնարաւորութիւն:

Ըստ այդմ ՝ ընթադրւում է, որ արդէն ամռանը ՀՅԴ-ն սկսելու է քայլե՞ր ձեռնարկել ժողովրդին ակտիւացնելու ուղղութեամբ:

Այո, մենք արդէն դա սկսել ենք, ուղղակի շեշտադրումներն են աւելի մեծանալու: «Քուէն ուժ է» նախաձեռնութեան միջոցով մենք փորձել ենք սկսել մի շարժում, որ ժողովուրդն արժեւորի իր քուէի գինը եւ ակտիւ լինի, մասնակցի ընտրութեանը, դերակատար լինի, չմտածի, որ անպայման կեղծուելու է, ինքը չի յաջողելու: Մենք ուզում ենք ժողովրդին համոզել, որ եթէ ինքն  ուզի՝ կարող է խախտումների դէմն առնել, իշխանութեան բերի այն քաղաքական ուժին, որին ցանկանում է: Բայց դրա համար պայմանն այն է, որ պէտք է գնայ ընտրութիւնների, համոզմունքով քուէարկի եւ ոչ թէ փողով:
Սակայն ՀՅԴ ընդհանուր ժողովն արդէն իբրեւ առկայ իրողութիւն է արձանագրել, որ յայտարարուած սկզբունքների եւ իրական կեանքի անհամապատասխանութիւնը յանգեցրել է «ընտրութիւնների  միջոցով ժողովրդի իշխանութիւն ձեւաւորելու հանդէպ անվստահութեան»:

Այո՛, կայ անվստահութիւն, բայց այս վիճակը պէտք է փոխենք, քանի որ ուրիշ ելք չկայ: Ուրիշ ելքն արդէն նշանակում է առճակատում, զինեալ պայքար, որին մենք հակուած չենք: Միակ ձեւը, որով մենք կարող ենք Հայաստանում գալ իշխանութեան՝ ժողովրդի վստահութիւնը շահելն է: Եւ որովհետեւ այդպէս է՝ մենք գուցէ քիչ արդիւնք ստանանք, բայց աւելի լաւ է՝ տքնաջան աշխատանքի լծուենք ու այս նպատակն իրագործելու առումով յաջողենք, քան թէ մտածենք խաբելով, ամբոխավարութեամբ ինչ-որ ալիք բարձրացնելու մասին: Մենք մնայունի կողմնակից ենք՝ ոչ թէ պահի ազդեցութեամբ ինչ-որ դասաւորութեան  հասնելու:

Գիտեմ, որ իմ այս հարցի վերջնական պատասխանը պէտք է տայ ՀՅԴ Հայաստանի ԳՄ-ն, սակայն քանի որ ընդհանուր ժողովը եւս քննարկել է ընտրական թեման՝ կա՞ն արդեօք որոշուած ուղենիշներ, արդէն ակնյա՞յտ է, որ 2012-ի ընտրութիւններին դաշնակցութիւնը մասնակցելու է առանձի՞ն, թէ՞ փորձ է արուելու ձեւաւորել դաշինք, մի նոր բեւեռ:

Առաջին հերթին, իրոք դա որոշելու իրաւունքը վերապահուած է ՀՅԴ Հայաստանի Գերագոյն ժողովին եւ մարմնին: Բայց  տեսականօրէն՝ մենք ոչ մի դուռ չենք փակում: Մենք նախ հաւատացած ենք, որ յամենայնդէպս՝ անհրաժեշտ է, որ ձեւաւորուի մի բեւեռ: Դա անպայման կազմակերպական բնոյթի առումով չենք ասում, որ միացեալ ցանկ ձեւաւորելու իմաստով եւ այլն: Սա ասում ենք այն առումով, թէ ինչպէս պէտք է տեղի ունենան ընտրութիւնները, ինչպէս պէտք է վերաբերուենք ժողովրդին, ընտրութիւնների փիլիսոփայութեանը, բարոյական մի նորմի ձեւաւորմանը, որ, դարձեալ եմ ընդգծում՝ մարդիկ քուէարկեն համոզմունքով, այլ ոչ թէ ընտրակաշառքով կամ վախով: Այս հարցի շուրջ անհրաժեշտ է ձեւաւորել բեւեռ՝ դրա կողմնակիցն ենք: Իսկ այլապէս՝ միացեալ ցուցակ ունենալ-չունենալը, ճակատ կազմել-չկազմելը խնդիրներ են, որոնք ընթացքը ցոյց կուտայ՝ մենք չունենք կարծրացած տեսակէտ, թէ անպայման պէտք է մենակ գնանք կամ անպայման պէտք է ընտրութիւններին մասնակցենք միացեալ ճակատով:

Հարցազրոյցը  վարեց
ԱՆՆԱ  ԻՍՐԱՅԷԼԵԱՆԸ