Հայաստանի ազգային ժողովը քուէներու բացարձակ մեծամասնութեամբ վաւերացուցած է Եւրասիական տնտեսական միութեան Հայաստանի անդամակցութեան համաձայնութիւնը:
Կողմ քուէարկած է 103 պատգամաւոր, դէմ 7՝, ձեռնպահ՝ մէկ:
Եւրասիական տնտեսական միութեան նախաձեռնած Վլատիմիր Փութին քանի մը օր առաջ Ռուսիոյ խորհրդարանի վաւերացման ներկայացուցած էր Եւրասիական տնտեսական միութեան Հայաստանի անդամակցութեան համաձայնութիւնը:
Հայաստանի անդամակցութեան համաձայնագիրը ստորագրուած է 10 Հոկտեմբերին՝ Մինսքի մէջ Եւրասիական տնտեսական միութեան գերագոյն խորհուրդի նիստին ընթացքին: Փաստաթուղթը ստորագրած են Ռուսիոյ, Պելոռուսիոյ, Ղազախստանի եւ Հայաստանի նախագահները: Մինսքի մէջ ստորագրուած համաձայնագիրը խարսխային այն փաստաթուղթն է ուր նշուած են Եւրասիական տնտեսական միութեան Հայաստանի միանալուն պայմանները:
Ըստ համաձայնագիրին, Հայաստան Եւրասիական տնտեսական միութեան լիարժէք անդամ կը դառնայ փաստաթուղթը ուժի մէջ մտնելու պահէն՝ այսինքն, երբ ատիկա կը վաւերացուի անդամ բոլոր երկիրներու խորհրդարաններուն մէջ, բայց ոչ շուտ, քան 1 Յունուար 2015-ը:
Այս միութեան ծնունդի թուականը յայտարարուած է 2015-ի 1 Յունուարը: Ընթացիկ տարուան 29 Մայիսին Ռուսիոյ, Պելոռուսիոյ եւ Ղազախստանի նախագահները Ասթանայի մէջ ստորագրեցին Եւրասիական տնտեսական միութիւն ստեղծելու մասին համաձայնագիրը՝ հաստատելով, որ ատիկա ուժի մէջ պիտի մտնէ 1 Յունուար 2015-էն:
ՀՅԴ կողմ քուէարկեց Եւրասիական միութեան անդամակցելու պայմանագրին
Հայաստանի անդամակցումը Եւրասիական միութեան փորձութիւն է, որը երկիրը պէտք է անցնէ «այն, ինչ չի սպանում, ուժեղացնում է» սկզբունքով, ՀՀ Ազգային Ժողովին մէջ ԵՏՄ-ին անդամակցութեան պայմանագրի քննարկման ընթացքին յայտարարեց ՀՅԴ խմբակցութեան ղեկավար Արմէն Ռուստամեանը:
Ըստ իր խօսքերուն՝ ինքը համամիտ է այն պնդումներուն, որ կարելի էր պայմանագիրը կազմելէն առաջ բանակցութիւնները աւելի լաւ վարել ու ամրացնել հայկական դիրքերը: «Բայց այսօրուայ որոշումը պէտք է կայացնել իրավիճակից ելնելով: Հայաստանն ու ԼՂՀ-ն շրջափակման եւ ռազմական դրութեան մէջ են: Աշխարհը սառը պատերազմի վիճակում է: Գերտէրութիւնների միջեւ ազդեցութեան համար պայքարը յանգեցրել է ուղիղ բախման: Հայաստանի համար կարեւոր է հարցը՝ ինչպէս վարուել տուեալ իրավիճակում: Օգնութեան են գալիս ասացուածքները՝ պատերազմում, ինչպէս պատերազմում եւ երբ կրակում են թնդանօթները, մուսաները լռում են: Հետեւաբար բոլոր քնարական շողումները եւ դասեր տալու փորձերն անընդունելի են» ըսած է ան:
«Մեր խնդիրն է յաջորդ սերունդներուն փոխանցել 42 հազար քառ. քմ. հայկական հող, որպէսզի համարձակ նայենք նրանց աչքերին: Եթէ դու երկրի անվտանգութիւնն ապահովելու աւելի լաւ այլընտրանք չունես, պէտք է պահպանես արդէն ունեցածը: ՀՅԴ-ի համար այդ պայմանագիրը երկրի անվտանգութեան հարցի լուծում է»: