Ատրպէյճանական «1news.az» կայքէջը կը հաղորդէ, որ Ատրպէյճանի արտաքին գործոց նախարար Էլմար Մամետեարով Ատրպէյճանի անկախութեան 20-ամեակին առիթով լոյս տեսած «Տը Պիզնես Եիր» պարբերաթերթի յատուկ թիւին մէջ  հրապարակուած իր հարցազրոյցին մէջ նշած է, որ ղարաբաղեան տագնապի լուծման հոլովոյթին մէջ Հայաստան եւ Ատրպէյճան յաջողած են շարք մը տարակարծութիւններ հարթել:

«Ղարաբաղեան տագնապին առնչութեամբ բանակցութիւնները ԵԱՀԿ-ի Մինսքի խմբակին միջնորդութեամբ կը շարունակուին արդէն 17 տարիէ ի վեր: Անձամբ ես 2010-ի ընթացքին իմ ռուս գործընկերոջս՝  Սերկէյ Լաւրովի միջնորդութեամբ քանի մը անգամ հանդիպած եմ հայ գործընկերոջս հետ: Բացի ատկէ, մենք մնայուն հանդիպումներու մէջ ենք ԵԱՀԿ-ի Մինսքի խմբակի համանախագահներուն հետ: Այդպիսով, Հայաստանն ու Ատրպէյճանը յաջողած են հարթել որոշ տարակարծութիւններ«, ըսած է Մամետեարով՝  աւելցնելով, որ «բայց եւ այնպէս, կողմերուն միջեւ գոյութիւն ունին որոշ կարեւոր տարրեր, որոնք տակաւին համաձայնեցման կը սպասեն»:
Նշելէ ետք, որ Ատրպէյճան կը հաւատայ ղարաբաղեան տագնապի խաղաղ լուծման, Էլմար Մամետեարով ընդգծած է. «Մենք խորապէս համոզուած ենք, որ խաղաղութիւնը կրնայ երկարատեւ ըլլալ, եթէ անիկա հիմնուի երկու համայնքներուն խաղաղ գոյակցութեան վրայ: Ատրպէյճանի տարածքային ամբողջականութեան ծիրին մէջ մենք պատրաստ ենք երկու համայնքներուն մասնակցութեամբ ինքնավարութիւն տրամադրելու այդ շրջանին»:

Հակամարտութիւնը Կը Խանգարէ Տարածաշրջանի Զարգացումը

Ատրպէյճանական լրատուամիջոցներու փոխանցումով, Ատրպէյճանի արտաքին գործոց նախարար Էլմար Մամետեարով  ընդունած է Մեծն Բրիտանիոյ խորհրդարանի անդամներու պատուիրակութիւնը եւ անոնց հետ զրուցած ատրպեճանա-բրիտանական յարաբերութիւններուն եւ Ատրպէյճանի մէջ բրիտանական կազմակերպութիւններուն ծաւալած գործունէութեան մասին: Ղարաբաղեան հակամարտութեան կարգաւորման անդրադառնալու միջոցին՝ Մամետեարով նշած է, որ հակամարտութեան կարգաւորման գործընթացին ձգձգումը թոյլ չի տար տարածաշրջանի հետագայ զարգացման գծով կանխատեսումներ ընելու:
Հիւրերը ընդգծած են երկու երկիրներուն միջեւ կապերու զարգացման կարեւորութիւնը եւ համոզում յայտնած՝ հակամարտութեան խաղաղ կարգաւորման գծով: