Ատրպէյճանական «1news.az» կայքէջը կը հաղորդէ, որ Ռուսիոյ նախագահ Տմիթրի Մետվետեւ Ատրպէյճանի անկախութեան 20-ամեակին առիթով լոյս տեսած «Տը Պիզնըս Եիր-Ատրպէյճան 2011» պարբերաթերթի յատուկ թիւին մէջ լոյս տեսած իր մեկնաբանութեան մէջ նշած է, որ Հայաստանի մէջ ռուսական ռազմակայանը կոչուած է կովկասեան շրջանին մէջ խաղաղութիւնն ու կայունութիւնը ապահովելու:


«Ռուսիոյ համար շատ կարեւոր հարցերէն է նաեւ Կովկասի մէջ կայունութեան ապահովումը: Ատիկա հիմնական հայեցակարգն է, որուն վրայ հիմնուելով յարաբերութիւններ կը կառուցենք մեր մօտիկ դրացի եւ բարեկամ Ատրպէյճանի հետ, որովհետեւ մենք շահագըր-գռուած ենք շրջանին մէջ խաղաղութեան ապահովումով: Եւ ճիշդ այդ շրջագիծին մէջ պէտք է դիտել Հայաստանի մէջ ռուսական ռազմակայանի տեղակայման  ժամկէտի երկարաձգումը, որուն մասին որոշումը տրուեցաւ Երեւան կատարած իմ այցելութեանս ընթացքին: Այդ ռազմակայանը կոչուած է խաղաղութիւն եւ կայունութիւն ապահովելու, ինչպէս նաեւ նուազեցնելու այն բարդութիւնները, զորս մենք այսօր ունինք», ընդգծած է Մետվետեւ:


ԼԵՌՆԱՅԻՆ ՂԱՐԱԲԱՂ

Ռուսիոյ նախագահը անդրադարձած է նաեւ ղարաբաղեան տագնապի լուծման հոլովոյթին եւ ատոր մէջ Մոսկուայի դերակատարութեան:
«Իմ մասնակցութեամբս Հայաստանի եւ Ատրպէյճանի նախագահներուն միջեւ հանդիպումներու յաճախականութիւնը հասած է պատմական առաւելագոյնի: Վերջերս խօսելով այդ նիւթին մասին՝ ես նշեցի, որ չեմ ամչնար մեր կողմէ կատարուած աշխատանքին համար: Անոնք եղած են կարեւոր քննարկումներ, որոնց ընթացքին կողմերը ընդգծած են բանակցային հոլովոյթին մէջ գոյութիւն ունեցող շարք մը բարդութիւններ: Սակայն, ամէն պարագայի, այդ ջանքերը որոշակի արդիւնք կու տան եւ բանակցութիւնները կը շարունակուին: Իմ կարծիքովս, այդ հանդիպումներուն յաճախականութիւնը պէտք չէ նուազի: Ռուսիան պատասխանատու է ԵԱՀԿ-ի Մինսքի խմբակի ծիրին մէջ ունեցած իր պարտաւորութիւններուն», ըսած է Մետվետեւ՝  ընդգծելով, որ Ռուսիոյ բարոյական պարտքն է աջակցիլ կողմերուն միջեւ խնդիրին առնչութեամբ ծաւալած երկխօսութեան շարունակման:
«Ես անձամբ պատրաստ եմ աջակցելու այդ հանդիպումներուն եւ քննարկումի դնելու բանակցութիւններու օրակարգի առաւել բարդ հարցերը: Յոյսով եմ, որ մօտիկ ապագային մենք շարունակենք նման խորհրդակցութիւնները մեր եւ մեր արտաքին գործոց նախարարներուն մասնակ      ցութեամբ:
«Ռուսիան լրջօրէն հաւատարիմ պիտի մնայ իր պարտաւորութիւններուն եւ համապատասխան քայլեր պիտի կատարէ աջակցելու անհրաժեշտ արդիւնքին հասնելու: Եւ այդ արդիւնքը կենսական նշանակութիւն ունի, որովհետեւ անկասկած կրնայ ռուսական շահերու գօտի նկատուող շրջանին բերել երկարատեւ խաղաղութիւն եւ անվըտանգութիւն», ըսած է Ռուսիոյ նախագահը:


ԱՏՐՊԷՅՃԱՆԻ ՀԵՏ ՀԱՄԱԳՈՐԾԱԿՑՈՒԹԵԱՆ ՓԱՅԼՈՒՆ ՀԵՌԱՆԿԱՐՆԵՐ

Խօսելով Ռուսիոյ եւ Ատրպէյճանի միջեւ ուժանիւթի մարզին մէջ համագործակցութեան մասին՝ Մետվետեւ զայն երկու երկիրներուն միջեւ համագործակցութեան կարեւոր բնագաւառներէն նկատած է:
«Լիովին համամիտ եմ Ատրպէյճանի նախագահ Իլհամ Ալիեւի այն կարծիքին, որ Ռուսիան եւ Ատրպէյճանը զիրար կը կապեն երկու ռազմավարական գործընկերներուն ջերմ եւ բարեկամական յարաբերութիւնները: Այդ յարաբերութիւններուն բնոյթը կ՛արտայայտուի տարբեր մարզերու մէջ գոյութիւն ունեցող համագործակցութեամբ՝  տընտեսական, մարդասիրական եւ անվտանգութեան ապահովման մարզերուն մէջ: Այդ սերտ կապերը յատկապէս արտայայտուեցան այն աջակցութեամբ, զոր Ռուսիան Ատրպէյճանէն ստացաւ վերջին բնական աղէտներուն ժամանակ, երբ  հրդեհները տարածուած էին Ռուսիոյ ամբողջ   տարածքին: Նայելով ապագային՝  կը տեսնեմ համագործակցութեան փայլուն հեռանկարներ», նշած է Ռուսիոյ նախագահը:
Տմիթրի Մետվետեւ նաեւ ընդգծած է, որ Ռուսիոյ եւ Ատրպէյճանի միջեւ համագործակցութեան կարեւոր մարզերէն կը նկատուի ուժանիւթի մարզը:
«Ինչպէս նախապէս նշած է Ատրպէյճանի նախագահը, ինչպէս նաեւ՝  ես, մեր երկիրները ու-ժանիւթի մարզին մէջ կարեւոր դերակատարներ կը նկատուին: Մենք ունինք բազմաթիւ հասարակաց շահեր, որովհետեւ ուժանիւթային հարստութիւններ կ՛արտադրենք եւ կ՛արտահանենք: Հետեւաբար, այդ մարզին մէջ անհրաժեշտ է հասնիլ համաձայնութեան եւ աւելի սերտ կերպով համագործակցիլ», ըսած է Մետվետեւ: