Պոլսոյ մէջ հրատարակուող «Ակօս» թերթի խմբագիր Հրանդ Տինքի ոճրասպան Օկիւն Սամասթի դատավարութեան աւարտին արձակուած վճիռին դէմ, բողոքի ցոյց մը կազմակերպեցին Հրանդ Տինքի Բարեկամները, արդարութիւն պահանջելով:

Մարդասպանի դատավարութիւնը աւարտեցաւ դատական վճիռով, որ կը նախատեսէ 23 տարի բանտարկութիւն, ոճրագործ Օկիւն Սամասթի համար։ Ընթացքի մէջ է երկրորդ դատավարութիւն մը, ուր կը քննուին Հրանդ Տինքի սպանութեան գործով այլ մեղսակիցներու պարագաները։
Բողոքի ցոյցին ներկայ գտնուեցաւ Գերմանիոյ Կանաչներու կուսակցութեան համանախագահ Քլոտիա Ռոթ, որ Պոլիս կայցելէ բանտարկուած լրագրողներու ի նպաստ արշաւի մը մասնակցելով։
Յիշեցնենք, թէ երբ թրքական դատարանը սպանութիւն գործելու համար 22 տարի 10 ամսուան բանտարկութեան ենթարկեց Օկիւն Սամասթը, «Amnesty International» իրաւապաշտպան կազմակերպութիւնը կոչ ըրաւ Թուրքիոյ իշխանութիւններուն՝ հետաքննելու պաշտօնական անձերու դաւադրութիւնն ու անփութութիւնը՝ կապուած 2007ին Հրանդ Տինքի սպանութեան հետ:
«Օկիւն Սամասթը Հրանդ Տինքի սպանութեան պատասխանատու մարդոցմէ մէկն է միայն: Իշխանութիւնները պարտաւոր են հետաքննելու անոր մահուան շուրջ բոլոր հանգամանքները եւ բոլոր պատասխանատուները պատասխանատուութեան կանչել դատարանի մէջ, ի՛նչ պաշտօն ալ զբաղեցնեն անոնք», ըսած է Թուրքիոյ գծով «Amnesty Internatioanal»ի փորձագէտ Անտրիու Կարտնըր:
2010 Սեպտեմբերին, Մարդու իրաւունքներու եւրոպական դատարանը հաստատած էր, թէ թրքական իշխանութիւնները չեն գործած իրենց ստացած տեղեկատուութեան համաձայն, ինչ որ կրնար կանխել Հրանդ Տինքի սպանութիւնը, եւ չեն հետաքննած պետական «չինովնիկ»ներուն  դերը անոր             մահուան մէջ: Արդարեւ, 2011 Յունիսին, սպանութեան սպառնալիքներ ուղարկուած էին «Ակօս» թերթի լրագրողներ Էթիէն Մահչուպեանի եւ Պասքըն Օրանի դէմ: Նման սպառնալիքներու համար ոչ ոք դատարան կանչուած է: