Նոյեմբեր 23ին, Սուրիոյ սահմանին վրայ ռուսական հալածիչին Թուրքիոյ կողմէ վար առնուելէն ետք, աւելիով փափուկ հարց դարձած է օդային սահմաններու յարգանքի հարցը, որու նկատմամբ Թուրքիա շատ «զգայուն» վերաբերում ցոյց տուաւ, Ռուսաստանի հետ դիւանագիտական մեծ տագնապի պատճառ դարձած յար
ձակողական իր այդ քայլն ալ արդարացնելով նոյն այդ զգայնութեամբ:
Մինչդեռ Թուրքիա ի՛նք կը շարունակէ բռնաբարել օդային սահմանները իր դրացի երկիրներուն, որոնց հետ իբրեւ թէ վճռած է վարել «զերօ հարցի» քաղաքականութիւն մը: Այսպէս, թրքական ռազմական օդուժի չորս հալածիչներ Յունուար 7ին բռնաբարած են Յունաստանի օդային տարածքը, Եգէականի հիւսիսային հատուածին մէջ, ինչպէս յայտնած է Յունաստանի պաշտպանութեան նախարարութիւնը, որ շեշտած է նաեւ, թէ անոնցմէ երկուքը օժտուած էին ռումբերով:
Յունական բանակի նախկին փոխ-հրամանատար Ֆրանկուլիս Ֆրանկոս Մոսկուայի «Ռոսքայա Կազեթա» թերթին յայտնած է, թէ «Անգարա գրգռիչ այս գործողութիւններով կ՚ուզէ աշխարհին ցոյց տալ, թէ Թուրքիա չի ճանչնար արեւելեան Միջերկրականի օդային եւ ծովային առկայ սահմանները»։ Արդարեւ, Եգէականի մէջ գտնուող յունական կղզիներու շրջանին մէջ կայ շուրջ 15 քմ.նոց օդային տարածութեան հատուած մը, զոր Թուրքիա կը մերժէ ճանչնալ իբրեւ յունական եւ ուր 2015ին ոչ նուազ քան 1300 անգամ խախտած է յունական սահմանը, 31 անգամուն հասնելով մինչեւ Յունաստանի հողերը: 2014ին, Թուրքիոյ եւ Յունաստանի միջեւ օդային սահմաններու խախտումներու առընչուող 2224 դէպք արձանագրուած է իսկ ապօրինի թռիչքներու թիւը 2014էն 2015 կրկնապատկուած է: