16 Յունիսին, Իտալիոյ Վերոնա քաղաքին մէջ կայացած է փողոցի մը անուանակոչութիւնը։ Փողոցը կոչուած է ջղային հիւանդութիւններու մասնագէտ, Վերոնայի համալսարանի առաջին վերատեսուչ Հրայր Թերզեանի անունով։
Արարողութեան ներկայ գտնուած են Վերոնայի քաղաքապետ Ֆլավիօ Տոզի, Վերոնայի համալսարանի վերատեսուչ Նիքոլա Սարթոր, Վերոնայի շրջանի փոխ-նախագահ Անտրէա Սարտելլի, Իտալիոյ Հայերու Միութեան նախագահ Մինաս Լուրեան, յայտնի գրող եւ Հրայր Թերզեանի նուիրուած կենսագրական գիրքի հեղինակ Անթոնիա Արսլան, բազմաթիւ ուսանողներ եւ դասախօսներ, ակադեմական շրջանակներու ներկայացուցիչներ եւ Վերոնայի բնակիչներ։
Միջոցառման մասնակիցներուն իր խօսքը ուղղած է Իտալիոյ մօտ Հայաստանի դեսպան Վիքթորիա Պաղտասարեան, որ նշած է, թէ Հրայր Թերզեան մէկն է հազարաւոր այն հայերէն, որոնք, որպէս Հայոց Ցեղասպանութենէն վերապրողներու զաւակ, ո՛չ միայն չյուսահատեցան, այլ նաեւ պահպանելով հայկական ինքութիւնը՝ կրցան նուիրուիլ նոր հայրենիքին, ուր յարգանքի ու գնահատանքի արժանացան։ Ան շնորհակալութիւն յայտնեց Վերոնա քաղաքի ու համալսարանի ղեկավարութեան։